गुन्ह्यात मुलालाही केली अटक
जळगाव (प्रतिनिधी):- पोलिसांच्या दक्षता पेट्रोल पंपावरील इंधन विक्रीतून आलेल्या १.३३ कोटी रुपयांचा अपहार करणारा पोलिस उपनिरीक्षक वाल्मीक वाघ पोलिसांना शरण आला. त्याच्या मुलाच्या बँक खात्याचाही सहभाग समोर आल्याने त्यालाही ताब्यात घेऊन दोघांना अटक केली आहे.
पोलिस दलाच्या दक्षता पेट्रोल पंपाच्या दैनंदिन व्यवहारांची जबाबदारी वाल्मीक वाघ याच्याकडे व्यवस्थापक म्हणून होती. त्यांनी १ कोटी ३३ लाख ७५२ रुपयांचा अपहार केल्याबाबत फसवणुकीचा गुन्हा दाखल झाला. वाघ पसार असल्याने त्याच्या शोधार्थ पथके रवाना केली होती. ९ मार्च रोजी स्वतः स्थानिक गुन्हे शाखेच्या कार्यालयात हजर झाला. त्यांची पोलिस अधीक्षक डॉ. महेश्वर रेड्डी, तपासाधिकारी राहुल गायकवाड यांनी चौकशी केली.
चौकशीत वाघ केवळ १० ते १५ लाखांचा अपहार केल्याचे सांगत आहे. वाल्मीक वाघ याला ताब्यात घेतल्यानंतर पोलिसांनी त्याच्या बँक खात्याची चौकशी केली. त्यात अपहार काळात मोठ्या प्रमाणात रक्कम ट्रान्सफर झाल्याची शक्यता वर्तवली जाते आहे. वाघ याच्या मुलाचाही गुन्ह्यात सहभाग असल्याच्या संशयावरून शेखर वाघला देखील अटक केली आहे.
