जळगाव स्थानिक गुन्हे शाखेची कारवाई
जळगाव(प्रतिनिधी):- शहरात लिफ्ट देण्याच्या बहाण्याने प्रवाशांना कारमध्ये बसवून शस्त्राचा धाक दाखवून लुटणाऱ्या टोळीचा स्थानिक गुन्हे शाखेने पर्दाफाश केला आहे. याप्रकरणी एका आरोपीला कारसह ताब्यात घेण्यात आले असून त्याचे इतर साथीदार अद्याप फरार आहेत.
सलमान खान अमान उल्ला खान (रा. निंभोरा, ता. रावेर) हे दि. २८ फेब्रुवारी रोजी सायंकाळी ५:१५ वाजेच्या सुमारास अजिंठा चौफुली येथे उभे होते. यावेळी एका पांढऱ्या कारमधून आलेल्या चार अज्ञात इसमांनी त्यांना १०० रुपये भाड्यात रावेरला सोडण्याचे आमिष दाखवून कारमध्ये बसवले. काही अंतर गेल्यावर कारमधील दोघांनी सलमान खान यांच्या कमरेला चाकू लावला, तर पाठीमागे बसलेल्या दोघांनी त्यांचे हात पकडून खिशातील ९,७०० रुपये जबरीने काढून घेतले.
या घटनेनंतर एमआयडीसी पोलीस स्टेशनमध्ये गुन्हा दाखल करण्यात आला होता. पोलीस अधीक्षक डॉ. महेश्वर रेड्डी यांच्या मार्गदर्शनाखाली स्थानिक गुन्हे शाखेचे निरीक्षक राहुल गायकवाड यांनी तपास चक्रावून गोपनीय माहितीच्या आधारे गुन्ह्यात वापरलेली कार शोधून काढली. याप्रकरणी अटक केलेला आरोपी शंभू उर्फ पप्पू सुभाष पाटील (रा. केदार नगर, पिंप्राळा, जळगाव) याला अटक करण्यात आली आहे.
गुन्ह्यात वापरलेली ४ लाख रुपये किमतीची स्विफ्ट डिझायर कार (क्र. एमएच-४३-एबी-९२१०) जप्त करण्यात आली आहे. तपासादरम्यान या गुन्ह्यातील इतर साथीदारांची नावे निष्पन्न झाली असून ते सराईत गुन्हेगार असल्याचे समोर आले आहे. पोलीस सध्या त्यांचा शोध घेत आहेत. या प्रकरणाचा पुढील तपास एमआयडीसी पोलीस स्टेशनचे पोलीस उपनिरीक्षक मोहम्मद अली सैय्यद करत आहेत.
ही कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी नितीन गणापुरे, एलसीबीचे निरीक्षक राहुल गायकवाड यांच्या मार्गदर्शनाखाली स्थानिक गुन्हे शाखेचे उपनिरीक्षक शरद बागल, सहायक फौजदार अतुल वंजारी, विजय पाटील, अक्रम शेख, नितीन बाविस्कर, रवींद्र कापडणे, किशोर पाटील, राहुल रगडे, छगन तायडे, प्रवीण चौरे या पथकाने यशस्वी केली.
