पाचोरा तालुक्यातील लोहारा येथील घटना
पाचोरा (प्रतिनिधी):- तालुक्यातील लोहारा येथे एक अत्यंत दुर्दैवी घटना घडली आहे. येथील ४४ वर्षीय प्रौढाने कर्जबाजारीपणाला कंटाळून गळफास लावून आपली जीवनयात्रा संपवली. या घटनेमुळे लोहारा व परिसरात मोठी हळहळ व्यक्त केली जात आहे.
संदीप विक्रम चौधरी (वय ४४, रा. लोहारा, ता. पाचोरा) असे मृत व्यक्तीचे नाव आहे. सोमवारी, दि. २ मार्च रोजी सकाळी ८ वाजेच्या सुमारास आंबेवडगाव रस्त्यावरील अशोक लिंगायत यांच्या शेतातील लिंबाच्या झाडाला संदीप यांनी गळफास घेतल्याचे उघडकीस आले. ही माहिती गावात पसरताच ग्रामस्थांनी घटनास्थळी धाव घेतली.
मृताचा चुलत भाऊ राजेंद्र सुपडू चौधरी यांनी पिंपळगाव (हरे.) पोलीस स्टेशनला या घटनेची माहिती दिली. त्यांनी दिलेल्या माहितीनुसार, संदीप यांनी कर्जबाजारीपणाला कंटाळून हे टोकाचे पाऊल उचलले आहे. घटनेची माहिती मिळताच पिंपळगाव हरेश्वर येथील स.फौ. अरविंद मोरे यांनी अकस्मात मृत्यूची नोंद केली आहे.
पोलिसांनी घटनास्थळी जाऊन रीतसर पंचनामा केला असून, मृतदेह शवविच्छेदनासाठी पाचोरा येथील नगरपालिकेच्या रुग्णालयात पाठवण्यात आला आहे. या घटनेचा पुढील तपास पिंपळगाव (हरे.) पो.स्टे.च्या स.पो.नि. कल्याणी वर्मा यांच्या मार्गदर्शनाखाली हवालदार शांतीलाल पगारे करीत आहेत.
मयत संदीप चौधरी यांच्या पश्चात आई, वडील, भाऊ, बहीण, पत्नी आणि दोन मुले असा मोठा परिवार आहे. कर्जाच्या विळख्यातून मार्ग न सापडल्याने एका कर्त्या पुरुषाने आयुष्य संपवल्यामुळे संपूर्ण चौधरी परिवारावर शोककळा पसरली आहे.
