सुसाईड नोटमध्ये ‘पिंटू’ नावाच्या व्यक्तीचा उल्लेख
चोपडा (प्रतिनिधी): येथील लोहिया नगर परिसरातील एका २५ वर्षीय तरुणाने खासगी सावकाराच्या सततच्या छळाला कंटाळून राहत्या घरी गळफास घेऊन आपली जीवनयात्रा संपवली. योगेश सुनील चौधरी असे मृत तरुणाचे नाव असून, त्याच्या खिशात सापडलेल्या सुसाईड नोटमुळे शहरात खळबळ उडाली आहे.
योगेशने २५ फेब्रुवारी रोजी सायंकाळी ६ वाजेच्या सुमारास राहत्या घरी गळफास घेतला. योगेश हा मजूर होता आणि अत्यंत हलाखीच्या परिस्थितीत आपल्या कुटुंबाचा उदरनिर्वाह करत होता. त्याच्या पश्चात आई, वडील आणि भाऊ असा परिवार आहे. योगेशच्या खिशात पोलिसांना एक चिठ्ठी सापडली आहे. या चिठ्ठीत त्याने ‘पिंटू’ नावाच्या व्यक्तीकडून १० हजार रुपये उसने घेतल्याचा उल्लेख केला आहे. या १० हजारांच्या मोबदल्यात योगेशने आतापर्यंत तब्बल २ लाख रुपये व्याजापोटी दिले होते. तरीही संबंधित सावकार पैशांसाठी त्याच्याकडे सतत तगादा लावत होता.
योगेशने चिठ्ठीत नमूद केल्यानुसार, सावकाराने त्याला वारंवार धमकावून मारहाण केली होती. त्याच्या आई-वडिलांनाही शिवीगाळ करण्यात आली होती. या मानसिक आणि शारीरिक छळाला कंटाळून तो आत्महत्या करत असल्याचे त्याने लिहिले आहे.
“पोलीस साहेबांनी ‘पिंटू’ला कडक शिक्षा करावी,” अशी आर्त विनंतीही त्याने मरण्यापूर्वी चिठ्ठीत केली आहे.चोपडा शहरात सावकारी पाशामुळे आत्महत्या होण्याची ही पहिलीच घटना नाही. यापूर्वीही अशा घटना घडल्या असून, गरिबांचे शोषण करणाऱ्या बेकायदेशीर सावकारांवर कठोर कारवाई करण्याची मागणी आता जोर धरू लागली आहे. याप्रकरणी पोलीस आता त्या ‘पिंटू’ नामक व्यक्तीचा शोध घेत असून पुढील तपास सुरू आहे.
