जळगाव शहरात पिंप्राळा येथील घटना
जळगाव (प्रतिनिधी) :- शहरातील पिंप्राळा परिसरातील कोळीवाडा येथे राहणाऱ्या एका ३८ वर्षीय तरुणाने आपल्या राहत्या घरी टोकाचे पाऊल उचलून जीवनयात्रा संपवल्याची धक्कादायक घटना शनिवारी दुपारी घडली. जगदीश शिवदास सोनवणे असे मृत तरुणाचे नाव असून, या घटनेमुळे परिसरात शोककळा पसरली आहे.
जगदीश शिवदास सोनवणे (वय ३८, रा. कोळीवाडा, पिंप्राळा) हे शनिवारी (दि. १४ फेब्रुवारी) दुपारी १२:३० वाजेच्या सुमारास आपल्या राहत्या घरी होते. याच वेळी त्यांनी अज्ञात कारणावरून आपली जीवनयात्रा संपवली.(केसीएन)घटनेची माहिती मिळताच परिसरात मोठी गर्दी झाली होती.जगदीश सोनवणे हे हातमजुरी करून आपल्या कुटुंबाचा उदरनिर्वाह करीत होते. कष्टकरी स्वभावाच्या जगदीश यांनी अचानक असे टोकाचे पाऊल का उचलले, याचे कारण अद्याप स्पष्ट होऊ शकलेले नाही.
त्यांच्या पश्चात आई, पत्नी, एक मुलगा आणि एक मुलगी असा परिवार आहे. घरातील कर्ता पुरुष गेल्याने सोनवणे कुटुंबावर दुखाचा डोंगर कोसळला आहे. घटनेची माहिती मिळताच स्थानिक पोलिसांनी धाव घेऊन पंचनामा केला. मृतदेह उत्तरीय तपासणीसाठी शासकीय रुग्णालयात पाठवण्यात आला आहे. याप्रकरणी संबंधित पोलीस ठाण्यात अकस्मात मृत्यूची नोंद करण्याचे काम रात्री उशिरापर्यंत सुरू होते. पुढील तपास पोलीस करीत आहेत.
