जळगाव जिल्हा परिषदेचा मोठा निर्णय
जळगाव (प्रतिनिधी) :- डिजिटल युगातील वाढती आव्हाने आणि बालकांच्या सुरक्षिततेचा विचार करून जळगाव जिल्हा परिषदेने एक क्रांतिकारी पाऊल उचलले आहे. बालसंरक्षण, लिंगसंवेदनशीलता आणि डिजिटल सुरक्षिततेसाठी UNICEF च्या सहकार्याने जिल्ह्यात तीन विशेष मॉड्यूल्स (कार्यपद्धती) विकसित करण्याचा निर्णय घेण्यात आला आहे.
जिल्हा परिषदेच्या मुख्य कार्यकारी अधिकारी मिनल करनवाल यांच्या अध्यक्षतेखाली १३ फेब्रुवारी रोजी पार पडलेल्या बैठकीत या महत्त्वपूर्ण उपक्रमाची रूपरेषा निश्चित करण्यात आली. या बैठकीत प्रामुख्याने दोन महत्त्वाच्या विषयांवर भर देण्यात आला. मुलांसाठी लहान वयापासूनच मुलांमध्ये स्त्रीची संमती, स्त्री शरीराविषयी आदर आणि लिंगसमतेची जाणीव निर्माण करणे. मुलींसाठी सोशल मीडियाचा वापर, अश्लील मजकूर आणि डिजिटल जगातील लैंगिक धोक्यांबाबत मुलींना योग्य वयात जागृत करणे.
तीन स्तरावर तयार होणार ‘मॉड्यूल्स’
प्रशासनाने या मोहिमेसाठी तीन स्वतंत्र मार्गदर्शक पुस्तिका तयार करण्याचा निर्णय घेतला आहे. पहिले मॉड्यूल UNICEF टीम शिक्षक व अंगणवाडी सेविकांसाठी ५ ते १० नैतिक मुद्द्यांची मार्गदर्शिका.दुसरे मॉड्यूल मानसोपचार तज्ज्ञ हे बालकांमधील मानसिक अडचणी आणि विकार ओळखण्यासाठी ‘हँडी रूलबुक’. तिसरे मॉड्यूल पालक शाळा, पालकांना मुलांच्या सोशल मीडिया वापराबाबत सजग व जबाबदार बनवणे. केवळ मॉड्यूल तयार करून न थांबता, त्याची प्रत्यक्ष अंमलबजावणी करण्यासाठी जिल्हा परिषदेने ठोस नियोजन केले आहे. प्रत्येक शाळा स्तरावर ‘बालसुरक्षा समिती’ स्थापन केली जाणार आहे. या समितीत शाळेचे मुख्याध्यापक, शिक्षक, अंगणवाडी सेविका आणि स्थानिक पोलीस बीट अंमलदार यांचा समावेश असेल. ही समिती शाळा व्यवस्थापन समितीच्या माध्यमातून सातत्याने पालकांशी आणि मुलांशी संवाद साधणार आहे.
“बालकांच्या सर्वांगीण आणि सुरक्षित विकासासाठी जिल्हा परिषद प्रशासन कटिबद्ध आहे. शाळा आणि अंगणवाडी स्तरावरूनच योग्य संस्कार आणि सुरक्षिततेचे धडे मिळाल्यास भविष्यातील अनेक संकटे टाळता येतील.”— मिनल करनवाल, मुख्य कार्यकारी अधिकारी, जि.प. जळगाव
