नॉन इलेक्ट्रिकल व्हेईकल वॉशर’ प्रकल्पास द्वितीय क्रमांक
शिरसोली (वार्ताहर) :- विभागीय वन अधिकारी व सामाजिक वनीकरण विभाग, जळगाव यांच्या संयुक्त विद्यमाने आयोजित ‘मेरी लाईफ’ प्रकल्प थीम अंतर्गत जिल्हास्तरीय स्पर्धेत शिरसोली येथील बारी समाज माध्यमिक व उच्च माध्यमिक विद्यालयाने घवघवीत यश संपादन केले आहे. विद्यालयाच्या हरित सेनेतर्फे सादर करण्यात आलेल्या नाविन्यपूर्ण प्रकल्पाने जिल्ह्यात द्वितीय क्रमांक पटकावला.
पर्यावरण संवर्धनाचा संदेश देण्यासाठी आयोजित या स्पर्धेत जळगाव जिल्ह्यातील सुमारे ५६ माध्यमिक व उच्च माध्यमिक विद्यालयांनी सहभाग नोंदवला होता. या अटीतटीच्या स्पर्धेत बारी समाज विद्यालयाच्या पायल बारी आणि भूमिका पाटील या विद्यार्थिनींनी ‘डोमेस्टिक नॉन इलेक्ट्रिकल व्हेईकल वॉशर’ (घरगुती वीजमुक्त वाहन धुण्याचे यंत्र) हे मॉडेल सादर केले. वीज न वापरता पाणी आणि उर्जेची बचत करणाऱ्या या प्रकल्पाने परीक्षकांचे लक्ष वेधून घेतले.
विभागीय वन अधिकारी एम.एस. झांजुर्णे यांच्या हस्ते विजेत्या विद्यार्थिनींना आणि मार्गदर्शक शिक्षकांना सन्मानचिन्ह (ट्रॉफी) व प्रमाणपत्र देऊन गौरविण्यात आले. या प्रकल्पासाठी विद्यालयाचे मुख्याध्यापक राजेंद्र आंबटकर यांच्या मार्गदर्शनाखाली हरित सेना प्रमुख चंद्रकांत कुमावत यांनी विशेष परिश्रम घेतले.
यावेळी व्यासपीठावर परीक्षक सुदर्शन शिसव, धनंजय पवार यांचेसह समाधान सोनवणे, वनरक्षक दीपक पाटील, वनरक्षक संभाजी पाटील, वनपाल उज्वला पाटील उपस्थित होते.
विद्यालयाच्या या यशाबद्दल संस्थेचे अध्यक्ष निलेश खलसे, शालेय समितीचे चेअरमन दिलीप बारी, सचिव सुरेश अस्वार, खजिनदार कमलाकर तांदळे, मुख्याध्यापक राजेंद्र आंबटकर, पर्यवेक्षक रामकृष्ण पाटील यांच्यासह सर्व शिक्षक व शिक्षकेतर कर्मचाऱ्यांनी विद्यार्थिनींचे आणि मार्गदर्शक शिक्षकांचे अभिनंदन केले आहे. शिरसोली परिसरातूनही या यशाबद्दल विशेष कौतुक होत आहे.
