रावेर गुन्हे शोध पथकाची मोठी कारवाई
रावेर ( प्रतिनिधी ) – शहरातून चोरीला गेलेल्या एका बुलेटचा तपास करत असताना, रावेर पोलिसांनी आंतरराज्य स्तरावर दुचाकींची चोरी करणाऱ्या टोळीचा पर्दाफाश केला आहे. या कारवाईत पोलिसांनी तीन अट्टल चोरांना अटक केली असून त्यांच्याकडून १३ लाख १० हजार रुपये किमतीच्या एकूण ९ महागड्या मोटारसायकली हस्तगत केल्या आहेत.
डिसेंबर २०२५ मध्ये जळगाव येथील एक फिर्यादी रावेरमध्ये आपल्या नातेवाईकांकडे आले होते. त्यांची नवीन पांढऱ्या रंगाची बुलेट घरासमोरून अज्ञात चोरट्यांनी लंपास केली होती. याप्रकरणी रावेर पोलीस स्टेशनला गुन्हा दाखल करण्यात आला होता. पोलिसांनी परिसरातील ९५ सीसीटीव्ही कॅमेऱ्यांचे फुटेज तपासले, परंतु आरोपींनी चेहरा झाकलेला असल्याने त्यांची ओळख पटवणे कठीण झाले होते.
तपासादरम्यान पोलीस निरीक्षक विशाल जयस्वाल यांना गोपनीय माहिती मिळाली की, चोरीची बुलेट शिरपूर येथे विकली गेली आहे. तांत्रिक माहितीच्या आधारे तपास पथकाने चोपडा आणि नंतर यावल तालुक्यातील कोरपावली येथे पाठलाग करून तीन संशयितांना ताब्यात घेतले.
गौरव दत्तात्रय तायडे (वय २० वर्षे), तौसिफ तय्यब कुलकर्णी, अब्दुल रहेमान तैय्यब पटेल (वय २० वर्षे, सर्व रा. कोरपावली, ता. यावल, जि. जळगाव) हे आरोपी केटरिंगच्या कामासाठी गुजरात राज्यातील वडोदरा व इतर शहरांत जात असत. तिथे रेकी करून त्यांना आवडलेल्या महागड्या दुचाकी चोरून ते महाराष्ट्रात आणत. सुरुवातीला दुचाकी लोटत नेणे आणि नंतर लॉक तोडून ती पळवणे अशी त्यांची पद्धत होती.
चोरी केलेल्या गाड्या ते कोरपावली गावात किंवा एकांत स्थळी लपवून ठेवत आणि नंतर कोणाच्या तरी मदतीने बनावट आर.सी. बुक बनवून त्यांची विक्री करत असत. पोलिसांनी आरोपींकडून वाहने जप्त केली आहेत. यात ४ रॉयल एनफिल्ड (बुलेट) (किंमत प्रत्येकी २ लाख रुपये), १ सुझुकी बर्गमन (किंमत १.२० लाख रुपये), १ यामाहा R15 (किंमत १.८० लाख रुपये), ३ इतर दुचाकी (ऍक्टिव्हा व स्प्लेंडर), एकूण जप्त किंमत १३,१०,०००/- रुपये मुद्देमाल जप्त केला आहे.
सदर कारवाई जळगाव जिल्हा पोलीस अधीक्षक डॉ. महेश्वर रेड्डी, अप्पर पोलीस अधीक्षक अशोक नखाते, आणि उपविभागीय पोलीस अधिकारी अनिल बडगुजर यांच्या मार्गदर्शनाखाली पोलीस निरीक्षक डॉ. विशाल जयस्वाल व त्यांच्या पथकाने केली. न्यायालयाने आरोपींना ३ दिवसांची पोलीस कोठडी सुनावली असून या प्रकरणात आणखी साथीदार वाढण्याची शक्यता वर्तवण्यात आली आहे.
