खा. स्मिता वाघ, डॉ. केतकी पाटील यांच्या उपस्थितीत भव्य सभा
जळगाव (प्रतिनिधी) : “भारतीय जनता पार्टीने नेहमीच विकासाचे राजकारण केले आहे. गेल्या काही वर्षांत प्रभागातील अनेक प्रलंबित कामे मी पूर्ण केली आहेत आणि भविष्यात उर्वरित विकासकामे पूर्ण करण्यासाठी भाजपच्या पूर्ण पॅनेलला निवडून द्या,” असे आवाहन आ. राजूमामा भोळे यांनी केले. प्रभाग १६ मधील महायुती व भाजप उमेदवारांच्या प्रचारार्थ आयोजित करण्यात आलेल्या सभेत ते बोलत होते.
या सभेला जळगावच्या खा. स्मिताताई वाघ आणि भाजप प्रदेश महिला उपाध्यक्ष डॉ. केतकीताई पाटील यांची प्रमुख उपस्थिती होती. प्रभाग १६ मधील भाजपचे अधिकृत उमेदवार विश्वनाथ खडके, वंदना संतोष इंगळे, रंजना वानखेडे, सुनील वामनराव खडके यांच्या प्रचारार्थ काढण्यात आलेल्या रॅलीचे रूपांतर नंतर सभेत झाले. यावेळी कार्यकर्त्यांनी मोठ्या संख्येने उपस्थित राहून शक्तीप्रदर्शन केले.
आमदार भोळे पुढे म्हणाले की, “आम्ही केवळ आश्वासनं दिली नाहीत, तर प्रत्यक्ष कामं करून दाखवली आहेत. रस्ते, पाणी आणि पथदिव्यांचे प्रश्न मार्गी लावले आहेत. हा विकासाचा वारसा पुढे नेण्यासाठी भाजपच्या या चारी उमेदवारांना मतदारांनी आशीर्वाद द्यावा.” खा. स्मिता वाघ यांनी देखील केंद्र आणि राज्य सरकारच्या योजनांचा उल्लेख करत, प्रभाग १६ च्या सर्वांगीण प्रगतीसाठी भाजपचे पॅनेल निवडून येणे काळाची गरज असल्याचे प्रतिपादन केले. डॉ. केतकी पाटील यांनी महिला मतदारांशी संवाद साधत भाजपच्या पाठीशी खंबीरपणे उभे राहण्याचे आवाहन केले.
प्रभागातील नागरिकांनी या सभेला मोठा प्रतिसाद दिला. उमेदवारांनी घरोघरी जाऊन मतदारांच्या गाठीभेटी घेतल्या असून, ‘कमळ’ चिन्हासमोरील बटन दाबून बहुमताने विजयी करण्याचे आवाहन यावेळी करण्यात आले.
