बोदवड व पारोळा पोलिस ठाण्यांत गुन्हे दाखल; पारोळा प्रकरणात दोन संशयितांना अटक
जळगाव जिल्हा, ( प्रतिनिधी ) : – जिल्ह्यात घरफोडीच्या दोन वेगवेगळ्या घटनांमध्ये चोरट्यांनी रोख रकमेसह सोन्याच्या दागिन्यांवर डल्ला मारल्याची घटना समोर आली आहे. बोदवड आणि पारोळा पोलिस ठाण्यांत याप्रकरणी गुन्हे दाखल करण्यात आले असून, पारोळा येथील प्रकरणात पोलिसांनी दोन संशयितांना अटक केली आहे.
बोदवडमध्ये ७० हजारांची रोकड व मशीन चोरीला
बोदवड पोलिस ठाण्यात गुन्हा रजिस्टर क्रमांक 191/2026 नुसार घरफोडी चोरीचा गुन्हा दाखल झाला आहे. मलकापूर रोड परिसरातील चौधरी प्लायवूड अँड हार्डवेअर डॉ. विशाल सुभाष चौधरी यांच्या घरात 5 सप्टेंबरच्या रात्री साडेसात वाजेपासून 6 सप्टेंबरच्या सकाळी 9.20 वाजेपर्यंतच्या काळात अज्ञात चोरट्याने प्रवेश केला.
घरातील 55 हजार रुपयांची रोकड तसेच अंदाजे 15 हजार रुपये किमतीचे तीन युरिया कटर ग्राइंडर मशीन, असा एकूण सुमारे 70 हजार रुपयांचा ऐवज चोरून नेण्यात आला.
याबाबत डॉ. चौधरी यांनी तक्रार दिल्यानंतर बोदवड पोलिसांनी भारतीय न्याय संहितेतील कलम 305 व 331(4) अन्वये गुन्हा नोंदविला आहे. या प्रकरणाचा तपास पोहेकॉं युनूस तडवी करीत आहेत. अद्याप आरोपीची ओळख पटलेली नाही.
पारोळ्यात सोन्याचे दागिने व रोकड लंपास
दुसरी घटना पारोळा तालुक्यातील खेडीकोक गावात घडली. फिर्यादी सुपडू नारायण पाटील (51) यांच्या राहत्या घरात 5 सप्टेंबर रोजी सकाळी 11 ते सायंकाळी 5.30 वाजेच्या दरम्यान अज्ञात चोरट्याने घराचे कुलूप तोडून प्रवेश केला.
चोरट्याने घरातील 50 हजार रुपयांची रोकड, 7 ग्रॅम वजनाचा अंदाजे 63 हजार रुपये किमतीचा सोन्याचा खडा, 11 ग्रॅम वजनाचा अंदाजे 99 हजार रुपये किमतीचा सोन्याचा खडा, तसेच 5 ग्रॅम वजनाची सुमारे 45 हजार रुपये किमतीची सोन्याची पोत, असा एकूण 2 लाख 57 हजार रुपयांचा मुद्देमाल चोरून नेला.
या प्रकरणी पारोळा पोलिस ठाण्यात गुन्हा रजिस्टर क्रमांक 334/2026 नुसार भारतीय न्याय संहितेतील कलम 305 व 331(3) अन्वये गुन्हा दाखल करण्यात आला आहे.
दोन संशयितांना अटक
या घरफोडी प्रकरणाच्या तपासादरम्यान पोलिसांनी गोकुळ उर्फ दादू धरमसिंग पाटील (22) आणि अन्य एका संशयिताला ताब्यात घेतल्याची नोंद पोलिसांनी केली आहे. दोघांबाबत पुढील तपास सुरू आहे.
पारोळा पोलिस ठाण्याचे सपोनि योगेश महाजन यांच्या मार्गदर्शनाखाली तपास सुरू असून, वरिष्ठ पोलिस अधिकाऱ्यांनीही तपास पथकाला आवश्यक सूचना दिल्या आहेत.
