जळगाव जिल्हा कारागृहातील प्रकार
जळगाव प्रतिनिधी : येथील जिल्हा कारागृहामध्ये बुधवार, २९ ऑक्टोबर रोजी दुपारी ४ वाजता गुंडांच्या एका टोळीकडून जुन्या वैमनस्यातून एका बंदीला गंभीर मारहाण झाल्याची धक्कादायक घटना समोर आली आहे. बॅरेक क्रमांक २ मध्ये घडलेल्या या घटनेमुळे पुन्हा एकदा कारागृहातील सुरक्षेवर प्रश्नचिन्ह निर्माण झाले आहे.
या मारहाणीत तेजस दिलीप सोनवणे (वय २५, रा. कांचन नगर, जळगाव) हा बंदी जखमी झाला आहे. बुधवारी दुपारी तेजस बॅरेक २ मध्ये झोपलेला असताना, याच कारागृहातील चार बंदींनी त्याला घेरले. आरोपींमध्ये पराग रविंद्र आरखे, बबलू उर्फ विशाल राजू गागले, भूषण विजय माळी उर्फ भाचा आणि सचिन कैलास चव्हाण यांचा समावेश होता. या चौघांनी तेजसला शिवीगाळ करण्यास सुरुवात केली. तेजसने कारण विचारले असता, आरोपींनी त्याला, ‘तू भूषण माळी उर्फ भाचा याचा विरोधक आहेस, तू त्याचे नादी लागतो का?’ असे धमकावले.
यानंतर या चौघांनी तेजसला मारहाण करण्यास सुरुवात केली आणि त्याच्या डोक्याच्या मागील बाजूस टणक वस्तूने जोरदार वार केले. ज्यामुळे तो गंभीर जखमी झाला.मारहाण करताना आरोपींनी तेजसला जीवे ठार मारण्याची धमकीही दिली. हा सर्व प्रकार सुरू असताना कर्तव्यावर असलेल्या कारागृह शिपायांनी तातडीने धाव घेतली आणि मध्यस्थी करून भांडण सोडवले.
मारहाणीत जखमी झालेल्या तेजस सोनवणे याला तातडीने जळगाव येथील शासकीय वैद्यकीय महाविद्यालयात उपचारासाठी दाखल करण्यात आले आहे. या गंभीर घटनेनंतर रात्री ९.३० वाजता जखमी तेजस सोनवणे याच्या तक्रारीवरून जिल्हापेठ पोलीस ठाण्यात आरोपी पराग आरखे, बबलू गागले, भूषण माळी उर्फ भाचा आणि सचिन चव्हाण या चार बंदींविरुद्ध गुन्हा दाखल करण्यात आला आहे.
