जळगाव शहरात आर. एल. चौकातील घटना
जळगाव (प्रतिनिधी) :- शहरातील एमआयडीसी परिसरातील आर. एल. चौकात गुरुवारी रात्री ८ वाजेच्या सुमारास ड्युटी आटोपून सायकलवरून घरी जात असलेल्या प्रौढाला दुचाकीवरील तरुणांनी जबर धडक दिली. यात उपचारादरम्यान प्रौढाचा मृत्यू झाला आहे. एमआयडीसी पोलीस स्टेशन येथे गुन्हा दाखल करण्यात आला आहे.
साहेबराव सुकलाल पाटील (वय ६५, रा. खुबचंद साहित्या नगर, जळगाव) असे मयत प्रौढांचे नाव आहे. त्यांच्या पश्चात आई, २ भाऊ, पत्नी, २ मुले, १ मुलगी असा परिवार आहे. एका कारच्या शोरूममध्ये वॉचमनची नोकरी करून ते परिवाराचा उदरनिर्वाह करीत होते.(केसीएन)दरम्यान, गुरुवारी दि. २३ रोजी रात्री ८ वाजता ते ड्युटी आटोपून सायकलवर घराकडे निघाले होते. आर. एल. चौकात आले असता एका भरधाव दुचाकीने त्यांना जबर धडक दिली.
यात त्यांच्या डोक्याला, कानाला, चेहऱ्याला जबर मार लागला. त्यांना शासकीय वैद्यकीय महाविद्यालय व रुग्णालय, जळगाव येथे उपचारासाठी दाखल करण्यात आले होते.(केसीएन)उपचार सुरु असताना त्यांचा मृत्यू झाला. यावेळी कुटुंबीयांनी रुग्णालयात एकच आक्रोश केला. घटनेमुळे एमआयडीसी परिसरात शोककळा पसरली असून एमआयडीसी पोलीस स्टेशनला दुचाकीस्वारांविरुद्ध गुन्हा दाखल करण्यात आला आहे.
