जळगाव शहरातील तांबापुरा परिसरात शोककळा
जळगाव ( प्रतिनिधी ) – शहरातील तांबापुरा परिसरातील बिलाल चौक येथे राहणारा तरुण दोन दिवसांपूर्वी बेपत्ता झाला होता. त्याचा मृतदेह आज शनिवार दि. २० सप्टेंबर रोजी सकाळी ८ ते ९ वाजेच्या दरम्यान मेहरूण तलाव येथे आढळून आला आहे. या प्रकरणी नातेवाईकांनी घातपाताचा संशय व्यक्त केला असून एमआयडीसी पोलीस स्टेशनला अकस्मात मृत्यूची नोंद करण्यात आली आहे.
शेख अबूजर शेख युनूस (वय २१, रा. बिलाल चौक, तांबापुरा परिसर, जळगाव) असे मयत तरुणाचे नाव आहे. तो गुरुवार दि. १८ सप्टेंबर रोजी संध्याकाळी ५ वाजेपासून घरून बेपत्ता झाला होता. तेव्हापासून त्याचा परिवार शोध घेत होते. दरम्यान एमआयडीसी पोलीस स्टेशन येथे बेपत्ता झाल्याची नोंद करण्यात आली होती. शनिवारी दि. २० सप्टेंबर रोजी मेहरूण तलाव येथे नेहमीप्रमाणे काही इसम हे मासेमारी करण्यासाठी आले असताना त्यांना शेख अबुजर याचा मृतदेह आढळून आला. त्यांनी एमआयडीसी पोलिसांना याची माहिती दिली. त्यानंतर त्याचा मृतदेह शासकीय वैद्यकीय महाविद्यालय व रुग्णालयात दाखल करण्यात आला.
या ठिकाणी वैद्यकीय अधिकाऱ्यांनी तपासून त्याला मयत घोषित केले. दरम्यान कुटुंबीयांना माहिती पडताच त्यांनी रुग्णालयात धाव घेतली व एकच आक्रोश केला. या ठिकाणी मृतदेहाची अवस्था पाहून नातेवाईकांनी घातपाताचा संशय व्यक्त केला आहे. घटनेप्रकरणी एमआयडीसी पोलीस स्टेशनला अकस्मात मृत्यूची नोंद करण्यात आली असून पुढील तपास पोलीस करीत आहे. घटनेमुळे तांबापुरा परिसरात शोककळा पसरली आहे.
