चोपडा तालुक्यात माचला फाट्याजवळ घटना
चोपडा (प्रतिनिधी) :- चोपड्याहुन नवा मोबाईल खरेदी करून दि. ८ रोजी सायंकाळी ५ वाजेच्या सुमारास दुचाकीने घरी जाणाऱ्या तालुक्यातील वर्डी येथील टेमरया उफे रगन जगन बारेला व मगन जगन बारेला या दोन सख्या भावांचा अपघातात मृत्यू झाल्याची दुर्दैवी घटना घडली. अडावद पोलीस स्टेशनला गुन्हा दाखल करण्यात आला आहे.
टेमरया उर्फ रगन जगन बारेला (वय १८) व मगन जगन बारेला (वय २५, रा. वर्डी ता. चोपडा) असे मयत तरुणांची नावे आहे. तरुणांच्या पश्चात आई, वडील, बहिणी व पत्नी असा परिवार आहे. दरम्यान, टेमरया उर्फ रगन व मगन जगन बारेला (वय ३०) हे दोन्ही सख्खे भाऊ दुचाकीने चोपडा येथे नवीन मोबाईल विकत घेण्यासाठी आले होते. मोबाईल व किरकोळ बाजार करून ते वर्डी येथील घरी जात होते. चोपडा ते अडावद रस्त्यावरील माचला फाट्‌यापुढील सुरेश पाटील यांच्या शेताजवळ भरधाव वेगात येणाऱ्या एका लाल रंगाच्या क्रेटा (एमएच ०४, एचएफ ८२९६) या चारचाकीने त्यांची दुचाकी (एमएच १९, एव्ही- ८५८२) ला जबर धडक दिली. या अपघातात दुचाकीवरील मगन बारेला हा जागीच ठार झाला, तर टेमरया बारेला याचा उपजिल्हा रुग्णालयात उपचार सुरु असताना मृत्यू झाला. चारचाकी वाहन मालकाला पोलिसांनी ताब्यात घेतले आहे. चोपडा उपजिल्हा रुग्णालयात नातेवाईकांनी मोठा आक्रोश केला. पुढील कारवाई अडावद पोलीस ठाण्यात रात्री उशिरापर्यंत सुरु होती. अडावद पोलीस स्टेशनला गुन्हा दाखल करण्यात आला आहे.
