जळगाव : अजिंठा चौफुली परिसरात एका वाईन शॉपबाहेर वाद घालणाऱ्या दोन तरुणांना हटकल्याचा राग आल्याने त्यांनी दुकानात घुसून मॅनेजर आणि कामगारांना बेदम मारहाण केली. या प्रकरणी दोघांविरुद्ध एमआयडीसी पोलीस ठाण्यात गुन्हा दाखल करण्यात आला आहे.
राजेंद्र युवराज सोनवणे (वय ३३, रा. सागर नगर) हे अजिंठा चौफुली येथील ‘राज वाईन शॉप’मध्ये मॅनेजर म्हणून काम करतात. ३० ऑगस्ट रोजी सायंकाळी पावणेसहा वाजण्याच्या सुमारास त्यांच्या दुकानाजवळ दोन व्यक्ती आपापसात वाद घालत होते. राजेंद्र सोनवणे आणि दुकानातील इतर कामगारांनी त्यांना ‘येथे वाद घालू नका’ असे सांगून समजावण्याचा प्रयत्न केला.
याचा राग आल्याने त्या दोघांनी दुकानावर हल्ला केला. त्यांनी जबरदस्तीने दुकानात प्रवेश केला आणि दगडाने काचेच्या दरवाजाची तोडफोड केली. त्यानंतर त्यांनी राजेंद्र सोनवणे आणि इतर कामगारांना शिवीगाळ करत मारहाण केली.
या घटनेनंतर राजेंद्र सोनवणे यांनी एमआयडीसी पोलीस ठाण्यात तक्रार दाखल केली असून, पोलिसांनी दोन्ही आरोपींविरुद्ध गुन्हा नोंदवला आहे. पुढील तपास सुरू आहे.
