जळगाव शहरात आकाशवाणी चौकात घडली घडना
जळगाव (प्रतिनिधी) :- जिल्हा दौऱ्यावर असलेले मुख्यमंत्री देवेंद्र फडणवीस यांच्या वाहनांच्या ताफ्यासमोर शुक्रवारी दि.२० रोजी आकाशवाणी चौकात सकाळी साडेदहाच्या सुमारास एका इसमाने अंगावर ज्वलनशील इंधन ओतून आत्मदहनाचा प्रयत्न केला. अचानक घडलेल्या या प्रकाराने पोलीस यंत्रणेची चांगलीच तारांबळ उडाली. आपण दाखल केलेल्या गुन्ह्यात पोलीस कर्मचाऱ्यांनी योग्य तपास न लावता चोरांना पाठीशी घातले असा आरोप त्यांनी यावेळी केला.
धरणगाव येथील क्रांतिवीर ख्वाजा नाईक यांच्या स्मारकाचे लोकार्पण आणि ग्रामीण रुग्णालयाचे भूमिपूजन करण्यासाठी मुख्यमंत्री देवेंद्र फडणवीस शुक्रवारी जळगाव जिल्ह्याच्या दौऱ्यावर होते. सकाळी दहाला मुंबईहून जळगाव विमानतळावर आगमन झाल्यानंतर मुख्यमंत्र्यांचा ताफा धरणगावकडे महामार्गाने रवाना झाला.(केबीएन)जळगाव शहरातील आकाशवाणी चौकातून मुख्यमंत्र्यांच्या वाहनांचा ताफा भरधाव जात असताना, राष्ट्रवादीच्या कार्यालयासमोर संजय वराडे यांनी अंगावर रॉकेल ओतून आत्मदहनाचा प्रयत्न केला. पोलिसांनी प्रसंगावधान राखून वराडे यांना वेळीच ताब्यात घेतल्याने अनर्थ टळला.
मुख्यमंत्री देवेंद्र फडणवीस यांच्या कार्यकाळातील ऊर्जा विभागाच्या कामांचे कंत्राट घेतले असताना, चिंचोली येथील वीज उपकेंद्राच्या साहित्याची मोठ्या प्रमाणात चोरी झाली. परिणामी, आपल्याला बरेच नुकसान सोसावे लागले. कुटुंबावर उपासमारीची वेळ आली. चोरीच्या तपासाचे काम सोपविलेल्या पोलीस कर्मचाऱ्यानेही आपल्याला न्याय दिला नाही. त्याच्याविषयी पोलीस अधीक्षकांकडे तक्रार करूनही काहीच उपयोग झाला नाही, अशी खंत संजय वराडे यांनी व्यक्त केली. मुख्यमंत्री तथा राज्याचे गृहमंत्री देवेंद्र फडणवीस यांनी दोषी पोलीस कर्मचाऱ्यावर आणि त्याला पाठीशी घालणाऱ्या अधीक्षकांवर कारवाई करावी, अशीही मागणी त्यांनी केली.
