भडगाव शहरात पेठ भागात किरकोळ कारणावरून घडला प्रकार
भडगाव (प्रतिनिधी) :- शहरातील पेठ भागात एका विवाहितेवर तिच्याच पतीने किरकोळ कारणावरून वाहनाद्वारे थेट जीवघेणा हल्ला केल्याची थरारक घटना घडली आहे. किरकोळ भांडणातून संतापलेल्या पतीने पत्नीच्या अंगावर टाटा नेक्सोन कार घालून, नंतर वाहन रिव्हर्स घेत तिला फरफटत नेले. या हल्ल्यात महिला गंभीर जखमी झाली आहे. तिच्या शरीरावर खोल जखमा व कातडी फाटली आहे. ही घटना १२ जून २०२५ रोजी सायंकाळी ५ वाजता घडली. याप्रकरणी भडगाव पोलीस स्टेशनमध्ये पतीविरुद्ध गुन्हा दाखल करण्यात आला असून, पुढील तपास सुरू आहे.
फिर्यादी तृप्ती रेवण पवार (वय ३२, रा. पेठ, भडगाव) यांनी फिर्याद दिली आहे. त्यांचा पती रेवण प्रमोद पवार (रा. पाचोरा) याच्याशी किरकोळ कारणावरून वाद केला. त्यानंतर आरोपीने तृप्ती यांची बहिण प्रियदर्शनी हिला शिवीगाळ व मारहाण केली.(केसीएन)पुढे मुलगी गार्गी हिला घेऊन जाण्याचा हट्ट धरला. फिर्यादी विवाहितेची बहीण व आई हे मुलीला घेण्यासाठी जवळ आले असताना फिर्यादीने वाहनात बसून कार थेट पत्नीच्या अंगावर घातली. तसेच वाहन रिव्हर्स घेऊन परत मागे घेऊन फरफटत नेले. ही घटना इतकी भयानक होती की, पाहणाऱ्यांच्या अंगावर काटा आला. पीडित महिलेच्या शरीरावर खोल जखमा झाले असून, तिची प्रकृती चिंताजनक आहे. या प्रकरणी भडगाव पोलीस स्टेशनला गुन्हा नोंदवण्यात आला आहे. तपास सहाय्यक पोलीस निरीक्षक गणेश मस्के यांच्या मार्गदर्शनाखाली सुरू आहे.
