मलकापूर, (प्रतिनिधी) : – पुण्यश्लोक अहिल्यादेवी होळकर जयंती, दैनिक अहिल्याराज वर्धापन दिन आणि हिंदी पत्रकार दिनाचे औचित्य साधून, स्थानिक पत्रकारितेत भरीव योगदान देणाऱ्या सुनीता राजेंद्र महाडिक यांना ‘इंडियन एक्सलन्स अवॉर्ड २०२५’ देऊन गौरवण्यात आले. हा प्रतिष्ठेचा पुरस्कार १ जून २०२५ रोजी मलकापूर येथे आयोजित एका विशेष समारंभात त्यांना प्रदान करण्यात आला.
सौ. महाडिक यांनी स्थानिक पातळीवर पत्रकारितेच्या माध्यमातून समाजाचे विविध प्रश्न प्रशासनापर्यंत पोहोचवण्यात महत्त्वाची भूमिका बजावली आहे. गेल्या अनेक वर्षांपासून त्या सक्रिय पत्रकारिता करत असून, त्यांनी अनेक सामाजिक विषयांना वाचा फोडली आहे. जनतेच्या समस्यांवर सातत्याने आवाज उठवून, त्यांच्या अभ्यासपूर्ण आणि तळमळीच्या वृत्तांकनामुळे अनेक प्रश्न मार्गी लागले आहेत.
दैनिक अहिल्याराजतर्फे दिला जाणारा ‘इंडियन एक्सलन्स अवॉर्ड’ हा समाजहितासाठी निस्वार्थपणे कार्य करणाऱ्या व्यक्तींना प्रदान करण्यात येतो. सौ. महाडिक यांना मिळालेला हा सन्मान त्यांच्या अथक कार्याची पावती असून, त्यांच्या पत्रकारितेच्या व्रताला यामुळे अधिक बळ मिळाले आहे.
