पाचोरा शहरात वरखेडी रोडवरील घटना, सव्वा ५ लाखांचा मुद्देमाल जप्त
पाचोरा (प्रतिनिधी) : शहरातील वरखेडी रोडवरील एका गोडावुनचे लाॅक तोडून १ लाख रुपये किंमतीच्या वस्तू चोरून नेणाऱ्या चोरट्यांना नागरिकांच्या सतर्कतेमुळे गस्तीवर असलेल्या पोलिस पथकाने ताब्यात घेतले. त्यांच्याकडून पोलिसांनी ५ लाख ३० हजाराचा मुद्देमाल जप्त केला असून ३ चोरट्यांना पाचोरा न्यायालयात हजर केले असता १७ पर्यंत पोलीस कोठडी सुनावली आहे.
पाचोरा शहरातील वरखेडी रोडवरील कालिका पोल्ट्री फार्म जवळ फिर्यादी जयप्रकाश अमरलाल जाधवाणी (रा. गणपती नगर, जळगाव) यांचे दारुच्या रिकाम्या बाटल्या ठेवण्याचे गोडावुन आहे. दि. १३ एप्रिल रोजी रात्री ११:४० वाजेच्या सुमारास संशयित आरोपी मोहन धोंडु पाटील, सोनु प्रकाश पाटील (रा. गलवाडे ता. सोयगाव) व भुषण दिनकर म्हासरे (रा. निंभोरा ता. सोयगाव) यांनी गोडावूनचे लाॅक तोडून आत प्रवेश केला. काचेच्या, अल्युमिनियमच्या, प्लास्टिकच्या वेगवेगळ्या ब्रांडच्या रिकाम्या बाटल्यांची चोरी करताना रात्री पोलीस निरीक्षक अशोक पवार यांच्या मार्गदर्शनाखाली गस्तीवर असलेले पोलीस उपनिरीक्षक प्रकाश चव्हाणके, पो. हे. काॅ. राहुल शिंपी, पोलिस काॅ. रणजित पाटील, योगेश पाटील, संदीप राजपूत, वाहन चालक अशोक पाटील यांनी घटनास्थळावरून तिघांना ताब्यात घेतले.
जयप्रकाश जाधवाणी यांनी पाचोरा पोलिसात दिलेल्या फिर्यादीवरून गुन्हा दाखल झाला आहे. संशयित आरोपी चोरट्यांना जेरबंद करण्यात आले असून त्यांच्याकडून ५ लाख रुपये किमतीचे वाहन क्र.(एमएच १९ सीवाय ७४८०) व ३० हजार रुपये किमतीच्या बाटल्या जप्त करण्यात आल्या आहेत. सदर गुन्ह्यात अटकेतील वरील तिन्ही संशयित आरोपी चोरट्यांना पाचोरा न्यायालयात हजर केले असता दि. १७ एप्रिलपर्यंत पोलीस कोठडी सुनावली आहे. सदर गुन्ह्याचा पुढील तपास पोलीस निरीक्षक अशोक पवार यांच्या मार्गदर्शनाखाली पो. हे. काॅ. राहुल शिंपी हे करीत आहेत.
