जळगाव शहरातील घटना
जळगाव ( प्रतिनिधी ) – रेल्वेत मुलीला नोकरी लावून देण्याचे आमिष दाखवत व बनावट आदेश पाठवून गोकूळ युवराज पाटील (वय ६०, रा. पिंप्राळा) यांची १३ लाख रुपयांत फसवणूक करण्यात आली. याप्रकरणी तिघांविरूद्ध रामानंदनगर पोलिसात गुन्हा दाखल झाला आहे.
संजय नथ्थू कोळी (रा. जैनाबाद, जळगाव), राम नारायण नेवाडकर (रा. सिडको, नाशिक) व सतीश गोकूळ पाटील (रा. जुनोने, ता. अमळनेर) असे गुन्हा दाखल झालेल्या व्यक्तींचे नाव आहे. कवयित्री बहिणाबाई चौधरी उत्तर महाराष्ट्र विद्यापीठातून निवृत्त झालेले गोकूळ पाटील हे मुलगी दीपाली हिच्या नोकरीसाठी प्रयत्न करीत होते. मार्च २०२३ मध्ये त्यांचे भाऊ मधुकर पाटील यांनी त्यांचे मित्र संजय कोळी याच्याशी भेट घालून दिली. नोकरी लावून देतो, मात्र १३ लाख रुपये लागतील, असे सांगितले. त्याने त्याचा जुनोने येथील मित्र सतीश पाटील याच्याशी बोलणे करून दिले. सतीश पाटील व गोकूळ पाटील यांनी नोकरीच्या कामासाठी नाशिक येथे राम नेवाडकर याची भेट घेतली असता, त्याने मुलीला रेल्वेमध्ये ग्रुप सी पदावर नोकरी लावून देण्याचे आमिष दाखविले.
गोकूळ पाटील यांनी सेवानिवृत्तीच्या रकमेतून संजय कोळी याला ८ मार्च २०२३ रोजी, १ लाख रुपये दिले. त्यानंतर नेवाडकर याने घरच्या पत्त्यावर ऑर्डर येईल असे सांगितले. १८ मे २०२३ रोजी टपालाद्वारे नोकरीचे आदेश (ऑर्डर) आले. त्यात ३० जून ते ५ जुलै २०२३ दरम्यान संपूर्ण कागदपत्रांसह मुंबई येथे हजर राहण्याचे कळविण्यात आले. ऑर्डर मिळाल्यानंतर १८ मे २०२३ रोजी सतीश पाटील याच्या खात्यावर पाच लाख व २५ मे २०२३ रोजी नेवाडकर याच्या खात्यावर ५ लाख रुपये पाठविण्यासह सतीश पाटील याला रोख २ लाख रुपये दिले.
नोकरीचे आदेश आल्याने गोकूळ पाटील हे ३० जून २०२३ रोजी मुलीला घेऊन मुंबई डीआरएम कार्यालयात गेले. त्यावेळी नोकरीचे हे आदेश बनावट असल्याचे समोर आले. पाटील यांनी नेवाडकर व त्याच्या साथीदारांना वेळोवेळी विचारणा केली. त्यावर त्यांनी उडवाउडवीचे उत्तर दिले. रक्कमही परत देण्यास टाळाटाळ केली. अखेर गोकुळ पाटील यांनी रामानंदनगर पोलीस स्टेशनला तक्रार दिल्यावरून गुन्हा दाखल करण्यात आला आहे.
