जळगाव शहरातील सुप्रीम कॉलनीतील घटना
जळगाव (प्रतिनिधी) : एमआयडीसीतील चटई कंपनीत काम करणाऱ्या परप्रांतीय तरुणाने सुप्रीम कॉलनी येथील राहत्या घरात गळफास घेऊन आत्महत्या केल्याची घटना शनिवारी सकाळी साडेआठ वाजता उघडकीस आली. याप्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली आहे.
अनिकेत विजय मौर्य (वय १८, रा. उत्तर प्रदेश, हल्ली मु. सुप्रीम कॉलनी, जळगाव) असे मयत तरुणाचे नाव आहे. अनिकेत हा वडील विजय मौर्य यांच्यासोबत सुप्रीम कॉलनी येथे भाड्याच्या खोलीत वास्तव्याला होता. एमआयडीसीतील एका चटई कंपनीमध्ये काम करून आपला उदरनिर्वाह करीत होते. अनिकेतची आई व बहिणी मूळ गावाला आहेत. दोघांची कंपनीत रात्रपाळी ड्यूटी होती. दरम्यान, शुक्रवारी रात्री वडील विजय मौर्य हे कंपनीत ड्यूटीला गेले तर अनिकेत हा कामावर गेलेला नव्हता. त्यामुळे तो एकटाच घरी होता. दुसऱ्या दिवशी शनिवारी सकाळी ८.३० वाजता वडील विजय मौर्य कामावरून घरी आले असता खोलीचा दरवाजा आतून बंद होता.
त्यांनी खूप वेळा आवाज देऊनही घरातून कोणताही प्रतिसाद मिळाला नाही. त्यांनी आजूबाजूच्या लोकांना तसेच नातेवाइकांना बोलावले व दरवाजा तोडून आत प्रवेश केला असता अनिकेत गळफास घेऊन आत्महत्या केल्याचे दिसले. या घटनेची माहिती मिळाल्यानंतर एमआयडीसी पोलिसांनी घटनास्थळी धाव घेतली. मृतदेह शासकीय वैद्यकीय महाविद्यालयात दाखल केला असता वैद्यकीय अधिकाऱ्यांनी तपासून मयत घोषित केले. घटनेप्रकरणी एमआयडीसी पोलीस स्टेशनला अकस्मात मृत्यूची नोंद करण्यात आली आहे.
