चोपडा ग्रामीण पोलीस स्टेशनचे अधिकाऱ्यासह कर्मचारी झटापटीत जखमी, एकाला अटक
जळगाव (प्रतिनिधी) : मध्यप्रदेशच्या सीमेवर असलेल्या उमर्टी गावाजवळ एका संशयित आरोपीला ताब्यात घेण्यासाठी चोपडा ग्रामीण पोलीस स्टेशनचे अधिकारी व कर्मचारी गेले असताना त्यांच्यावर ग्रामस्थांकडून जबर हल्ल्याचा प्रयत्न झाला. यात ग्रामस्थांकडून हवेत गोळीबार झाल्यावर पोलिसांकडूनही प्रत्युत्तरात हवेत गोळ्या झाडून प्रतिकार करण्याचा प्रयत्न झाला. यात २ अधिकारी व कर्मचारी जखमी आहेत. तर एका अपहरण करण्यात आलेल्या कॉन्स्टेबलची स्थानिक पोलिसांच्या मदतीने सुटका करण्यात आली आहे.
याबाबत पोलिस अधीक्षक डॉ. महेश्वर रेड्डी यांनी प्रसारमाध्यमांना माहिती दिली आहे. चोपडा ग्रामीण पोलीस स्टेशनचे निरीक्षक यांना गोपनीय माहिती मिळाली होती.(केसीएन)उमर्टी गावात देशी कट्टा बनविला जातो. म्हणून त्या ठिकाणी बनावट ग्राहक पाठवून खात्री करण्यात आली होती. उमर्टी गावाची दक्षिण दिशा महाराष्ट्रात येते तर उत्तर दिशा ही मध्य प्रदेश भागात आहे. या दक्षिण दिशा भागामध्ये देशी कट्टा बनवणाऱ्या गुन्हेगारांवर कारवाई करण्यासाठी चोपडा ग्रामीण पोलीस स्टेशनचे सहाय्यक पोलीस निरीक्षक शेषराव नितनवारे व त्यांचे ७ कर्मचारी हे संशयित आरोपीला अटक करण्यासाठी गेले होते.
त्या ठिकाणी संशयित आरोपीला ताब्यात घेऊन निघत असताना अचानक १०० ते दीडशे जणांचा जमाव पोलिसांसमोर आला. त्यांनी पोलिसांवर हल्ला करण्याचा प्रयत्न केला. त्यातील काहींनी हवेत गोळीबार केला. प्रत्यूत्तरात पोलिसांनी गोळीबार करून जमावाला पांगवण्याचा प्रयत्न केला. त्यात काही जमावाने शशिकांत पारधी या पोलीस कॉन्स्टेबलला ताब्यात घेऊन गावात अपहरण करून घेऊन गेले. (केसीएन)तर काही पोलिसांना मार लागला आहे. सदर घटनेची माहिती मिळताच पोलीस अधीक्षक डॉ. महेश्वर रेड्डी हे घटनास्थळी दाखल झाले होते. दरम्यान, मध्यप्रदेशातील स्थानिक पोलिसांच्या मदतीने अपहरण झालेले पोलीस कॉन्स्टेबल शशिकांत पारधी यांची सुटका करण्यात आली आहे.
दरम्यान संशयित आरोपी पप्पीसिंग याला चोपडा ग्रामीण पोलीस स्टेशनच्या कर्मचाऱ्यांनी ताब्यात घेऊन अटक केली आहे. तर उमर्टी गावात झालेल्या घटनेप्रकरणी मध्य प्रदेशातील स्थानिक पोलीस स्टेशनला गुन्हा दाखल करण्याची प्रक्रिया सुरू आहे, अशी माहिती पोलीस अधीक्षक डॉ. महेश्वर रेड्डी यांनी दिली आहे. दरम्यान या घटनेमुळे एकच खळबळ उडाली आहे.
