पुणे (प्रतिनिधी) – अभिनेत्री गार्गी फुले यांनी मंगळवारी दि. ३० रोजी राष्ट्रवादी काँग्रेस पक्षाचे प्रदेशाध्यक्ष जयंत पाटील आणि राष्ट्रवादीचे नेते, विधानसभा विरोधी पक्ष नेते अजित पवार यांच्या उपस्थितीमध्ये राष्ट्रवादीत प्रवेश केला आहे. अभिनयाकडून राजकारणाकडे त्यांनी वाटचाल केली असून पुणे जिल्ह्यामध्ये त्यांना महत्त्वाची जबाबदारी दिली जाणार असल्याचे पक्षाचे सूत्रांकडून सांगण्यात आले.
काही वर्षांपूर्वी अभिनेते अमोल कोल्हे यांनी राष्ट्रवादीत प्रवेश केला होता. ते सध्या लोकसभा सदस्य आहेत. अभिनेत्री प्रिया बेर्डे यांनी देखील राष्ट्रवादीत प्रवेश केला होता. काही काळापूर्वी महाराष्ट्राची हास्य जत्रा फेम अभिनेते प्रभाकर मोरे यांनी देखील राष्ट्रवादी काँग्रेस पक्षात प्रवेश केला होता. लावणी सम्राज्ञी सुरेखा पुणेकर, गायक संजय लोंढे, गायिका वैशाली माडे यांनी देखील राष्ट्रवादी काँग्रेस पक्षात प्रवेश केला आहे.
मराठी चित्रपट सृष्टीतील अजरामर असलेले दिवंगत अभिनेते निळू फुले यांनी अनेक चित्रपटांमध्ये राजकीय नेत्याच्या भूमिका साकारल्या. त्यांनी साकारलेल्या भूमिकांचे अवघ्या महाराष्ट्रावर गारुड आहे. प्रत्यक्षात मात्र निळू भाऊ राजकारणापासून लांब होते. मात्र राष्ट्र सेवा दलात काम केल्यामुळे त्यांची सामाजिक जाणिव मात्र अत्यंत प्रगल्भ होती. सामाजिक कार्यांत ते अग्रेसर होते. त्यांची कन्या गार्गी नीलकंठ फुले या कला क्षेत्रात काम करतात, मात्र आता राजकीय क्षेत्रात देखील त्यांनी पदार्पण केले आहे.
