जळगाव ( प्रतिनिधी ) – मोटारसायकलवर सोबत जाण्यास नकार दिल्यानंतर तुझ्याकडे चाकू आहे, आम्हाला तुझी झडती घेऊ दे’ असे म्हणत अनोळखी भामट्यांनी तरुणाला मारहाण करुन पॅन्टच्या खिशातील सहा हजार रुपये व ३० हजार रुपयांचा मोबाइल हिसकावून घेत ते फरार झाले
पाचोरा येथील अभिलाष रमेश येवले (वय २८, रा. पाचोरा) शासकीय ठेकेदार आहेत. २७ रोजी नेहमीप्रमाणे ते पाचोर्‍याहून प्रवासी वाहनाने जळगावात आले. रात्री उशिरापर्यंत काम केल्यानंतर त्यांचे सहकारी ओम जांगीड यांच्या कारने नुक्कड कॉर्नरपर्यंत आले. तेथे दुसर्‍या वाहनाची वाट पाहत येवले उभे होते. या वेळी मोटारसायकलवर आलेल्या अनोळखी दोघांनी त्यांना मोटारसायकलवर पाचोरा येथे सोडून देण्याचे सुचविले. परंतु, ते ओळखीचे नसल्याने येवलेंनी जाण्यास नकार दिला. याचा राग आल्यानंतर ‘तू येथे कोणाचा तरी खुन करण्यासाठी आला आहे, तुझ्याकडे चाकू आहे, आम्हाला तुझी झडती घेऊ दे’ असे म्हणत या भामट्यांनी त्यांची जबरदस्तीने झडती घेतली . येवलेंनी विरोध करताच या दोघांनी त्यांना मारहाण करुन पॅन्टच्या खिशातील सहा हजार रुपये रोख व ३० हजार रुपयांचा मोबाइल काढून पोबारा केला.
अभिलाष येवले यांनी दिलेल्या फिर्यादीवरुन एमआयडीसी पोलिस ठाण्यात गुन्हा दाखल करण्यात आला आहे. पोलिस उपनिरीक्षक रवींद्र गिरासे तपास करीत आहेत. दरम्यान, काल रात्री एका संशयिताला पोलिसांनी ताब्यात घेतल्याची माहिती सूत्रांनी दिली.
