धरणगाव ( प्रतिनिधी ) – गेल्या वर्षांपासुन सार्वजनिक बांधकाम विभागाने उड्डाण पुलापासून धरणी नाला पुलापर्यंत, शहरातील प्रमुख रस्त्याचे उद्घाटन होऊन काँक्रिटीकरणाचे व डिव्हाईडरची कामे सुरू करण्यात आली होती. मात्र सुरू असलेली कामे बंद करण्यात आली व जे रस्ते तयार केलेत, त्या रस्त्यावरही खड्डे पडले आहेत. आजतागायत रस्त्यांचे कामे करण्यास धरणगाव बांधकाम उपविभाग असमर्थ ठरल्यामुळे माहिती अधिकार कार्यकर्ता महासंघाचे विभागीय जिल्हाध्यक्ष राजेंद्र वाघ हे २३ जुलै पासून उपोषणास बसणार आहेत.
शहरातील गूड शेफर्ड इंग्लिश स्कूल, उड्डाण पूल, छत्रपती शिवाजी महाराज स्मारक, बस स्थानक, व्हाईट हाऊस, मटन मार्केट, पारोळा नाका, पाटील वखार, भूमी गार्डन जवळील ( पाटाच्या पुलाजवळ ) रस्त्यात पडलेल्या खड्ड्यामधील पाण्याचे जलपुजन करून वृक्ष लावून आंदोलन करण्यात येणार आहे. छत्रपती शिवाजी महाराजांच्या स्मारक जवळ ते उपोषणास बसणार आहेत.
रस्त्याच्या व डिव्हाईडर कामासंदर्भात विचारणा करण्यासाठी विभाग अभियंता यांच्या कार्यालयात आठ दिवसांपासून आम्ही भेट घेण्याचा प्रयत्न केला परंतु, अभियंता चर्चेला आले नाहीत. यामुळे धरणगावातील सामाजिक कार्यकर्ते राजेंद्र वाघ व सामाजिक संघटना यांनी उपोषणाचा मार्ग अवलंबविला आहे.
