भडगाव ( प्रतिनिधी ) – घर सोडून निघून जावे म्हणून झालेल्या वादात घरमालकीण महिलेला विषारी औषध पाजून जीवे मारण्याचा प्रयत्न करणाऱ्या तीन जणांविरोधात गुन्हा दाखल करण्यात आला आहे.
निला अरूण देवरे (वय-५३) श्रमीक नगर, नाशिकच्या असून सध्या देव्हारी कनाशी ( ता. भडगाव ) येथे पती व कुटुंबियांसह वास्तव्याला आहे. त्यांनी त्यांचे घर अजबराव हिलाल पाटील यांना भाड्याने दिले आहे. २९ एप्रिलरोजी निला देवरे यांनी अजबराव पाटील यांना घर खाली करून द्या असे सांगितले. याचा राग आल्याने अजबराव पाटील, रोहिदास पाटील आणि विकास पाटील ( तिघे रा. देव्हारी कनाशी , ता भडगाव ) यांनी त्यांना विषारी औषध पाजून जीवे मारण्याचा प्रयत्न केला त्यांचे पती अरूण देवरे यालादेखील बांबूने मारहाण करून गंभीर दुखापत केली .अत्यवस्थ वाटत असल्याने त्यांना जळगावच्या जिल्हा शासकीय वैद्यकीय महाविद्यालयात दाखल करण्यात आले . या विवाहितेच्या फिर्यादीवरून संशयित आरोपी अजबराव पाटील, रोहिदास पाटील आणि विकास पाटील या तिघांविरोधात गुन्हा दाखल करण्यात आला आहे. पुढील तपास स पो नि चंद्रसेन पालकर हे करीत आहेत.
