जळगाव ( प्रतिनिधी ) – जळगांव शहरातील चित्रा चौकात जेवणासाठी आलेल्या व्यापाऱ्यांच्या कारची काच फोडून बॅग चोरी केल्याची घटना सोमवारी दुपारी १ वाजेच्या सुमारास घडली. याप्रकरणी शहर पोलिस स्टेशनला गुन्हा दाखल करण्याचे काम सुरु आहे.
शिरपूर येथील फर्टीलायझर विक्रीचा व्यवसाय असलेले जितेंद्र शालीग्राम भदाणे हे एका मित्रासह जळगांवमार्गे चारचाकी क्रमांक (एमएच.१८.बीसी.०२५७) ने जामनेर जात होते. दुपारी १२.४० च्या सुमारास चित्रा चौकात असलेल्या एका फर्टीलायझर दुकानाच्या बाहेर त्यांनी कार उभी केली आणि जेवणासाठी जवळच्या हॉटेलमध्ये गेले. दोघे जेवण करुन १.१५ वाजता परत आले असता त्यांना मागील दरवाज्याची काच फुटलेली दिसून आली.
कारमध्ये डोकावून पहिले असता मागील सीटवर ठेवलेली बॅग त्यांना दिसून आली नाही. दोघांनी तात्काळ शहर पोलिसात जाऊन पोलिसांना माहिती दिली. शहर पोलिसांनी घटनास्थळी जाऊन सर्व जाणून घेतले. बॅगमध्ये दहा हजारांची रोकड आणि महत्वाचे दस्तऐवज होते. याप्रकरणी शहर पोलीस स्टेशनला गुन्हा दाखल करण्यात येत आहे.
