जळगाव (प्रतिनिधी) – महाराष्ट्रातील गडचिरोली आणि चंद्रपूर हे दोन जिल्हे वगळता अन्यत्र कदापिही न आढळणारा रुका प्रजातीचा साप शिरसोली शिवारात आज आढळल्याने वन्य प्रेमींमध्ये उत्सुकता व कुतूहल व्यक्त केले जात आहे.
शिरसोली शिवारातील राजू पाटील यांच्या शेतात वीजपंप सुरु करतांना हा साप दिसल्याने त्यांनी व भूषण ताडे यांनी सर्पमित्र ऋषिकेश बारी आणि मयूर धनगर यांना बोलावून हा साप सुरक्षितपणे अडचणीतून बाहेर काढला आता ते या दुर्मिळ सापाला वनखात्याच्या अधिकाऱ्यांच्या ताब्यात देणार आहेत. बिनविषारी जातीचा हा साप महाराष्ट्रातील गडचिरोली जिल्ह्यात वडी आंजड आणि चंद्रपूर जिल्ह्यात येल्या नावाने ओळखला जातो. गोव्यात तो पास्को नावाने ओळखला जातो.
रुका सापाची लांबी साधारणपणे ३ फुटांपासून ५ फूट ७ इंचांपर्यन्त असते. शिरसोलीत आज सापडलेल्या सापाची लांबी सव्वातीन फूट आहे. त्याचे सोनेरी डोळे स्पष्ट दिसतात. या सापाला चिडवल्यास किंवा आपण धोक्यात आहोत अशी जाणीव त्याला झाल्यास तो मानेचा रंग निळा, पिवळा आणि पांढरा अश्या तीन रंगांमध्ये बदलतो. त्याला डिवचले तर तो मानेकडचा भाग फुगवून त्याच्या खवल्यांमध्ये लपलेला निळा रंग दाखवितो. अत्यंत वेगात सरपटणारा साप हे त्याचे वैशिष्ठये आहे. बेडूक, पाली, सरडे हे त्याचे खाद्य आहे. अशी माहिती सर्पमित्र ऋषिकेश बारी आणि मयूर धनगर यांनी दिली.
