नवी दिल्ली ( वृत्तसंस्था ) – पंतप्रधान नरेंद्र मोदी यांच्यावर हल्ल्याचा कट बिहार पोलिसांनी उधळला आहे. पाटण्यात दोन दहशतवाद्यांना अटक करण्यात आली आहे. एकजण माजी पोलीस अधिकारी आहे
त्यांच्याकडून भारताला २०४७ पर्यंत इस्लामिक राष्ट्र बनवण्याचा कट रचला जात होता. याचाच भाग म्हणून पंतप्रधान मोदींना १२ जुलैच्या दौऱ्यात लक्ष्य करण्याच्या कटाचाही समावेश होता. अटक केलेल्या दोन दहशतवाद्यांची नावं अथर परवेज व मोहम्मद जलालुद्दीन अशी आहेत.
पंतप्रधान मोदींच्या दौऱ्याच्या पार्श्वभूमीवर संशयित दहशतवाद्यांचं १५ दिवसांचं प्रशिक्षण फुलवारी शरिफ येथे झालं. त्यांनी ६ व ७ जुलैला पंतप्रधान मोदींवर हल्ला करण्याचा कट रचण्यासाठी बैठक घेतली. याची माहिती गुप्तचर विभागाला मिळाल्यानंतर पोलिसांनी ११ जुलैला फुलवारी शरिफ येथे धाड टाकली. यावेळी पोलिसांना घटनास्थळावरून काही कागदपत्रे मिळाली. यात ‘२०४७ पर्यंत भारत एक इस्लामिक राष्ट्र’ नावाचे कागदपत्र सापडले. याशिवाय २५ पीएफआय पॅम्प्लेटही हस्तगत करण्यात आले.
फुलवारी शरिफ येथे भेट देणाऱ्या आणि दहशतवादी हल्ल्यासाठी प्रशिक्षण घेणाऱ्या युवकांमध्ये बहुसंख्य युवक उत्तर प्रदेश, केरळ, पश्चिम बंगाल, तामिळनाडू येथून आलेले आहेत अटक करण्यात आलेल्या दोन्ही संशयित दहशतवाद्यांना पाकिस्तान, बांगलादेशव तुर्कीसारख्या मुस्लीम देशांमधून पैसे मिळत असल्याचं पोलिसांनी सांगितलं
हे दोन्ही दहशतवादी पॉप्युलर फ्रंट ऑफ इंडियाशी संबंधित आहे. हे व्यक्ती मार्शल आर्टच्या नावाखाली शस्त्रे वापरण्याचे प्रशिक्षण देण्यासाठी शिबिर देखील चालवत होते. मोहम्मद जल्लालुद्दीन हा झारखंड पोलीसमधील सेवानिवृत्त अधिकारी आहे. अतहर परवेज बंदी घालण्यात आलेल्या सिमी संघटनेचा सदस्य होता. अटक करण्यात आलेले व्यक्ती फुलवारी शरीफ परिसरातील नवीन टोला अहमद पॅलेसमध्ये मार्शल आर्ट प्रशिक्षणाचे शिबिर चालवायचे. मात्र प्रत्यक्षात या शिबिराच्या आडून ते एका विशिष्ट समाजातील लोकांना दहशतवादी कारवायांचे तसेच शस्त्रे चालवण्याचे प्रशिक्षण देत होते. त्यांच्या शिबिरामध्ये परराज्यातील तरुण देखील येऊ लागले होते. मात्र हे तरुण हॉटेलमध्ये मुक्कामाला थांबण्यासाठी आपली खरी ओळख देत नव्हते.
