पाचोरा ( प्रतिनिधी ) – मराठा समाजाला तात्काळ आरक्षण मिळावं या मागणीसाठी पुणे येथील बापूराव गुंड पुणे ते दिल्ली उलट पायी प्रवासाला निघाला आहे पाचोरा मराठा महासंघ पदाधिकाऱ्यांनी त्यांची भेट घेऊन शुभेच्छा दिल्या.
मराठा आरक्षण व इतर मागण्यांसाठी पुणे ते दिल्ली उलट पायी चालत जाण्याचा संकल्प घेऊन जनजागृती करणाऱ्या बापूराव गुंड यांची पाचोरा मराठा महासंघाने धुळे येथे भेट घेऊन चर्चा केली. बापूराव गुंड यांनी पुणे ते दिल्ली उलट पायी प्रवास करून पंतप्रधानांसह अन्य प्रमुख नेत्यांना निवेदन देण्यासाठी आपले आंदोलन सुरू केले आहे.
बापूराव गुंड यांनी 22 फेब्रुवारीरोजी फुरसुंगी- पुणे येथून उलट पायी चालत दिल्लीकडे प्रस्थान केले आहे. मराठा आरक्षण, मतदानाची सक्ती, मराठा आरक्षणासाठी कायद्यात दुरुस्ती, महिलांवरील वाढते अत्याचार थांबवावेत, मुलींना मोफत शिक्षण , शेतीला अखंडीत वीज पुरवठा, यासह अनेक मागण्याचे निवेदन ते दिल्ली येथे पंतप्रधानांना देणार आहेत.
9 मार्च रोजी ते धुळे येथे पोहोचले. सायंकाळी पाचोराच्या पदाधिकाऱ्यांनी कृषी उत्पन्न बाजार समितीचे माजी सभापती सतीश शिंदे यांचे समवेत बापूराव गुंड यांची धुळे येथे भेट घेऊन आंदोलनात सहभाग नोंदवला. बापूराव गुंड व सतीश शिंदे यांच्या जुन्या मैत्रीच्या गप्पा यावेळी झाल्या. याप्रसंगी पाचोरा तालुका मराठा महासंघाचे अध्यक्ष प्रा. शिवाजी शिंदे, उपाध्यक्ष प्रा. एस.डी. थोरात, सुनील देशमुख, सरचिटणीस राहुल बोरसे, चिटणीस चंद्रकांत पाटील, वैभव लांडगे, धुळे पंचायत समितीचे माजी सदस्य नितीन पाटील, शिवसेना धुळे जिल्हा संपर्क प्रमुख अतुल सोनवणे, जेष्ठ पत्रकार निंबा मराठे आदी मान्यवर उपस्थित होते.
