जळगाव (प्रतिनिधी) – धरणगाव तालुक्यातील पाळधी येथून जळगावला कामावर जात असताना तरुणाला अज्ञात वाहनाने जैन इरिगेशन कंपनीजवळ जबर धडक दिल्याने तो गंभीर जखमी झाला आहे. जैन इरिगेशनच्या रुग्णवाहिकेतून त्याला उपचारासाठी शासकीय वैद्यकीय महाविद्यालय व रुग्णालयात दाखल करण्यात आले आहे.
सचिन गोपाल झंवर (वय ३०,रा.पाळधी ता.धरणगाव) असे त्याचे नाव आहे.जळगाव येथे औषधी विक्रीच्या दुकानांमध्ये तो कामाला आहे. सकाळी अकरा वाजता तो नेहमीप्रमाणे पाळधी येथील घरून जळगावला निघाला होता. जैन इरिगेशन जवळ आल्यावर अज्ञात वाहनाने त्याला जोरदार धडक दिली.
यात त्याच्या डोक्याला व डाव्या हाताला मार लागून तो गंभीर जखमी झाला. यावेळी त्याच्या मदतीला जैन इरिगेशन कंपनीचे लोक धावून आले. त्यांनी तात्काळ कंपनीची रुग्णवाहिका आणून त्याला शासकीय वैद्यकीय महाविद्यालय व रुग्णालय, जळगाव या ठिकाणी उपचारार्थ दाखल केले. येथे वैद्यकीय अधिकाऱ्यांनी त्याच्यावर उपचार केले.
दरम्यान बांभोरी गाव ते पाळधीच्या दरम्यान सातत्याने अपघात होत आहेत. या अपघातावर नियंत्रण येण्यासाठी प्रशासनाने पुढाकार घेण्याची गरज यावेळी नागरिकांनी व्यक्त केली.
