यावल तालुक्यातील मोहराळा येथील घटना
यावल (प्रतिनिधी) : यावल तालुक्यातील मोहराळा येथील २३ वर्षीय विवाहिता गावातीलच तिच्या २२ वर्षीय प्रियकरासोबत आपल्या एक वर्षीय बाळाला घेऊन पळून गेली होती. याच नैराश्यातून विवाहितेच्या पतीने आत्महत्या केली. याप्रकरणी शनिवार दिनांक २७ जुलै रोजी यावल पोलीस ठाण्यात दोघांविरुद्ध आत्महत्येस प्रवृत केल्याप्रकरणी गुन्हा दाखल करण्यात आला. दोघांना यावल पोलिसांनी अटक केली आहे.
मोहराळा, ता.यावल गावातील तुषार गोपाळ पाटील (वय २८) या तरुणाची पत्नी वैष्णवी तुषार पाटील ही तिच्यासोबत एक वर्षीय बालक समर्थ याला सोबत घेऊन तिचा प्रियकर प्रशांत सहदेव पाटील (वय ३०, रा.मोहराळा) याच्यासोबत दिनांक १६ जुलै रोजी पळून गेली होती.(केसीएन)याप्रकरणी विवाहितेच्या संदर्भात यावल पोलीस ठाण्यात हरवल्याची तक्रार देखील नोंदवण्यात आली. पती तुषार पाटील यांना पत्नी प्रियकरासोबत पळून गेल्याचे कळाल्यानंतर ते निराश झालेे व या नैराश्यातून त्यांनी दिनांक १९ जुलै रोजी मोहराळा येथे राहत्या घरात गळफास घेतला.
याप्रकरणी शनिवार २७ जुलै रोजी यावल पोलीस ठाण्यात मयत तरुणाचे वडील गोपाळ शामराव पाटील यांनी दिलेल्या फिर्यादीवरून वैष्णवी पाटील आणि प्रशांत पाटील या दोघांविरुद्ध आत्महत्येस प्रवृत्त केल्याचा गुन्हा दाखल करण्यात आला. (केसीएन)या दोघांना पोलिसांनी अटक देखील केली. तपास यावलचे पोलीस निरीक्षक प्रदीप ठाकूर यांच्या मार्गदर्शनाखाली पोलीस उपनिरीक्षक सुनील मोरे, हवालदार राजेंद्र पवार, हवालदार उमेश सानप करीत आहे.
