ओम गोपाल चुघरा (वय ६० रा. नेहरू नगर, जळगाव) हे परिवारासह वास्तव्याला असून चहा पावडरचा व्यापार करून ते उदरनिर्वाह करत असतात. मंगळवार २६ मार्च रोजी रात्री ९.३० वाजता ओम चुघरा हे त्यांची स्कुटी (एमएच १९ डीएन ७८२९) ने घरी नेहरू नगरात जात होते. तेव्हा संशयित आरोपी गौरव खुशाल जयस्वाल (वय-२० रा. नाथवाडा जळगाव) याने व्यापाऱ्याची दुचाकी अडवून चाकूचा धाक दाखवत स्कुटीला लावलेली पैशांची बॅग हिसकावून जबरी चोरी करण्याचा प्रयत्न केला होता.
याप्रकरणी एमआयडीसी पोलीस ठाण्यात गुन्हा दाखल करण्यात आला. दरम्यान गुन्हा दाखल झाल्यानंतर एमआयडीसी पोलिसांनी संशयित आरोपी गौरव जयस्वाल याला नाथवाडा परिसरातून अटक केली. त्याच्यावर एमआयडीसी पोलिसात गुन्हा दाखल करण्यात आला. दरम्यान गौरव जयस्वाल हा याच व्यापाऱ्याकडे दोन वर्षांपूर्वी कामाला होता ऑनलाईन शेअर मार्केटमध्ये पैसे गमावल्याने त्याला आलेल्या आर्थिक अडचणीमुळे त्याने जबरी चोरी करण्याचा प्रयत्न केल्याचे निष्पन्न झाले आहे. ही कारवाई पोलीस अधीक्षक महेश्वर रेड्डी, उपविभागीय पोलिस अधिकारी संदीप गावित, एमआयडीसी पोलीस ठाण्याचे पोलीस निरीक्षक बबन आव्हाड यांच्या मार्गदर्शनाखाली पोलीस उपनिरीक्षक दत्तात्रय पोटे, सहायक फौजदार अतुल वंजारी, पोहेकॉ किरण पाटील, चंद्रकांत पाटील, साईनाथ मुंडे, रवी पाटील यांनी केली आहे. न्यायालयाच्या आदेशानुसार संशयित आरोपीला कारागृहात रवानगी केली आहे.
