भुसावळ तालुक्यातील वरणगाव येथील घटना
भुसावळ (प्रतिनिधी) :- तालुक्यातील वरणगाव शिवारातील गट नंबर ७८३ मधील शेतातील विहिरीत पडल्याने येथील भंगाळे वाडा येथील रहिवासी योगीता धीरज भंगाळे (वय ३५) यांचा गुरुवारी सकाळी ८.३० वाजेच्या सुमारास मृत्यू झाला होता. याप्रकरणी वरणगाव पोलीस स्टेशनला आता आत्महत्येस प्रवृत्त केल्याप्रकरणी पतीवर गुन्हा दाखल करण्यात आला आहे.
मयत योगीता भंगाळे यांच्या पश्चात पती, मुलगा आणि मुलगी असा परिवार आहे. त्यांनी विहिरीत उडी घेऊन आत्महत्या केल्याप्रकरणी अकस्मात मृत्यूची नोंद करण्यात आली होती. यानंतर याप्रकरणी मयत विवाहितेचे वडील सुभाष वराडे यांनी याबाबत वरणगाव पोलीस ठाण्यात फिर्याद दिली. त्यानुसार महिलेचे पती धिरज कडू भंगाळे (रा. भंगाळे वाडा, वरणगाव) याच्या विरोधात आत्महत्येस प्रवृत्त केल्याप्रकरणी गुन्हा दाखल करण्यात आला. पुढील तपास पोलीस उपनिरीक्षक मंगेश बेंडकोळी हे करीत आहे. या दुर्दैवी घटनेमुळे भंगाळे वाडा तसेच त्यांचे माहेर असलेल्या काहुरखेडा गावात शोककळा पसरली आहे.
