यावल तालुक्यातील दहिगाव येथील घटना
यावल (प्रतिनिधी) : तालुक्यातील दहिगाव या गावातील १४ वर्षीय अल्पवयीन मुलीला घरात विद्युत मोटारीमुळे विजेचा शॉक लागला आणि ती जमिनीवर कोसळून बेशुद्ध पडली. तातडीने तिला उपचारार्थ यावल ग्रामीण रुग्णालयात आणण्यात आले. या ठिकाणी डॉक्टरांनी तातडीने तिच्यावर उपचार करत तिचे प्राण वाचवले. ही घटना शनिवारी दुपारी घडली. सध्या या अल्पवयीन मुलीवर यावल रुग्णालयात उपचार सुरू आहेत.
दहिगाव गावातील रहिवासी प्रांजल हर्षराज होले (१४) असे या मुलीचे नाव आहे. ही अल्पवयीन मुलगी शनिवारी आपल्या घरी होती. नळाला पाणी आले आणि ती पाण्याची मोटर लावत होती. याचवेळी अचानक तिला विजेचा शॉक लागला आणि ती जमिनीवर कोसळून बेशुद्ध झाली.
तिच्या कुटुंबीयांनी तिला तातडीने उपचारार्थ यावल ग्रामीण रुग्णालयात आणले. या ठिकाणी वैद्यकिय अधिकारी डॉ. तुषार सोनवणे, अधिपरिचारिका भोळे, अमोल अडकमोल यांनी तातडीने या अल्पवयीन मुलीवर उपचार सुरू केले आणि तिचे प्राण वाचवले. दरम्यान, तरुणीची प्रकृती सध्या स्थिर आहे. मुलीच्या कुटुंबीयांनी डॉक्टरांचे आभार मानले आहे.
