जळगाव तालुक्यातील किनोद येथील घटना
जळगाव (प्रतिनिधी) : घरामध्ये असलेल्या पत्र्याच्या कुलरला सुरू करण्यासाठी बारा १२ वर्षीय बालिकेने विजेचे बटन सुरू करत असताना विजेचा जोरदार धक्का लागून तिचा मृत्यू झाल्याची धक्कादायक घटना तालुक्यातील किनोद येथे शुक्रवारी दि. १२ एप्रिल रोजी दुपारी घडली आहे. याप्रकरणी जळगाव तालुका पोलीस स्टेशनला अकस्मात मृत्यूची नोंद करण्याचे काम सुरू होते.
अक्षदा किशोर मोरे (वय १२) असे मयत बालिकेचे नाव आहे. ती किनोद गावात आई आणि दोन बहिणींसह राहत होती. तिचे वडील किशोर मोरे यांचे एक वर्षांपूर्वी कर्करोगाच्या दुर्धर आजाराने निधन झाले आहे. तर आई ही हात मजुरी करून परिवाराचा उदरनिर्वाह चालवत होती. दरम्यान शुक्रवारी दि. १२ एप्रिल रोजी दुपारी साडेतीन वाजेच्या सुमारास घरात गरम होत असल्याने चिमूरड्या अक्षदाने कुलर सुरू करण्यासाठी विजेचे बटन दाबण्याचा प्रयत्न केला.
त्यावेळेला विजेचा जोरदार धक्का बसल्याने अक्षदा ही जोरात फेकली गेली. कुटुंबीयांच्या लक्षात येताच त्यांनी शेजारच्या नागरिकांच्या मदतीने तिला शासकीय वैद्यकीय महाविद्यालय व रुग्णालय, जळगाव येथे दाखल केले. तिथे तपासणी करून वैद्यकीय अधिकारी डॉ. निलेश पाटील यांनी तिला मयत घोषित केले. यावेळी कुटुंबीयांनी मन हेलावणारा आक्रोश केला.
पोलिसांना माहिती मिळताच त्यांनी घटनास्थळी धाव घेतली. तसेच जळगाव तालुका पोलीस स्टेशनला अकस्मात मृत्यूची नोंद करण्याचे काम सुरू होते.
