जिल्ह्यातील २१ ऑगस्टपासून काम बंद आंदोलनाचा इशारा
जळगाव (प्रतिनिधी) : नगरपालिका व राज्यातील महानगरपालिकांमध्ये सफाई कामगारांना सातव्या वेतन आयोगाचा फरक मिळालेला असताना जळगाव महापालिकेत अद्यापपर्यंत एकही हप्ता मिळालेला नाही. त्यामुळे १६ ऑगस्ट रोजी काळ्या फिती लावून कामकाज करण्यात येणार असून दि. २१ ऑगस्टपासून काम बंद करण्याचा इशारा सफाई कामगारांनी दिला आहे. याबाबत सफाई कामगारांनी मंगळवारी महापालिकेत आंदोलन करत आयुक्तांना निवेदन दिले आहे.
शासनाने महापालिकेत कार्यरत व निवृत्त झालेल्या अधिकारी, कर्मचाऱ्यांना सातवा वेतन लागू केला आहे. राज्यात हप्त्याच्या रकमा वितरीत झाल्या, मात्र जळगाव मनपात सातत्याने निवेदने, आंदोलने देऊनही पहिला हप्ता देखील दिला नाही. मुलांचे शिक्षण, घराचे हप्ते, घर संसार यामुळे कामगारांची मोठी कसरत होत आहे. त्यामुळे कर्मचाऱ्यांमध्ये असंतोष निर्माण झाला आहे.
अखिल भारतीय सफाई मजदूर संघटनेच्यावतीने जिल्हाध्यक्ष अजय घेंगट यांच्या नेतृत्वात मंगळवारी महापालिका प्रवेशद्वाराजवळ मनपा प्रशासनाविरोधात घोषणाबाजी करण्यात आली. त्यानंतर आयुक्त ज्ञानेश्वर ढेरे यांची भेट घेऊन त्यांना निवेदन सादर करण्यात आले.
