पायी रॅलीद्वारे होणार जोरदार शक्तिप्रदर्शन
जळगाव (प्रतिनिधी) : महाविकासआघाडीचे जळगाव व रावेर लोकसभेचे दोन्ही उमेदवार बुधवारी दि. २४ एप्रिल रोजी सकाळी ११ वाजता जोरदार शक्तिप्रदर्शन करून उमेदवारी अर्ज भरणार आहेत. यावेळी शिवसेना ठाकरे गटाचे आदित्य ठाकरे, संजय राऊत, संजय सावंत, राष्ट्रवादी काँग्रेस पक्षाचे शरद पवार गटाचे प्रदेशाध्यक्ष जयंत पाटील, आ. जितेंद्र आव्हाड उपस्थित राहणार आहेत.
महाविकास आघाडीचे जळगाव लोकसभा मतदारसंघात करण पवार पाटील हे उमेदवार असून रावेर मतदारसंघात श्रीराम पाटील हे उमेदवार आहेत. दोन्ही उमेदवार त्यांच्या मतदारसंघात जोरदार प्रचार करीत आहेत. विधानसभानिहाय प्रचार सभा देखील जोरदार सुरु आहेत. तसेच, विविध गावागावात, शहरात उमेदवारांचे प्रचारफेरी देखील धडाका लावत आहेत. आता नामनिर्देशन अर्ज भरण्याची वेळ सुरू झाली असून महाविकासआघाडीचे दोन्ही उमेदवार करण पवार पाटील व श्रीराम पाटील हे बुधवारी दि. २४ एप्रिल रोजी उमेदवारी अर्ज भरणार आहेत.
अर्ज भरण्यासाठी शिवसेना ठाकरे गटाचे नेते आदित्य ठाकरे, खा. संजय राऊत, खा. संजय सावंत हे उपस्थित राहणार आहेत. तर राष्ट्रवादी काँग्रेस पक्षाचे प्रदेशाध्यक्ष जयंत पाटील, आ. जयंत आव्हाड हे उपस्थिती देणार आहेत. शिवतीर्थ मैदानातून नामांकन भरण्यासाठी रॅली निघणार असून रॅलीत शेकडोंच्या संख्येने कार्यकर्ते उपस्थिती देणार आहेत. तसेच शिवसेना ठाकरे गट, काँग्रेस, राष्ट्रवादी काँग्रेस पक्षाचे शरद पवार गटाचे पदाधिकारी उपस्थिती देणार आहेत.
