चोपडा ( प्रतिनिधी ) – चोपडा परिसरात गस्त घालणार्या पथकातील तलाठ्याला मारहाण करणार्या वाळू माफियांपैकी एकाला अटक करण्यात आली असून दुसरा मात्र फरार झाला आहे.
शनिवारी रात्री साडेअकराच्या सुमारास तलाठ्यांचे पथक अवैघ गौणखनिजाच्या चोरीला आळा घालण्यासाठी गस्त घालत होते. वाळूने भरलेले ट्रॅक्टर (एमएच- १९, सीझेड- ०५४३) पथकाने अडवून चालकाची विचारपूस केली. त्याने पथकाशी हुज्जत घातली. चालकासोबत असलेल्या व्यक्तीने ट्रॅक्टरमधून फावडा काढत तलाठी आबाजी सोनवणे यांच्या डोक्यावर दांड्याने वार केला. लाथ मारुन सोनवणे यांना शिवीगाळ करत ठार मारण्याची धमकी दिली. नंतर चालकासह व तो व्यक्ती घटनास्थळावरून फरार झाला. परंतु, चालक राजू भील याला पोलिसांनी अटक केली आहे. दुसरा संशयित फरार आहे.
या पथकात आबाजी सोनवणे, भूषण पाटील, आशिष काकडे, कल्पेश कुंवर यांचा समावेश होता. शहर तलाठी आबाजी सोनवणे यांच्या फिर्यादीवरून चोपडा शहर पोलिसांत कलम ३५३, ३७९, ३३२ प्रमाणे गुन्हा दाखल केला आहे. तपास पोउनि घनश्याम तांबे करत आहेत.
