जामनेर(प्रतिनिधी ) – वाकोद येथील हरी नगर तांडा येथे अगोदर दोन मुली असतांना तिसरी मुलगी झाल्याने नवजात अर्भक मुलीची तिच्या तोंडात तंबाखू घालून तिला झोक्यात घालून जीवे ठार केल्याप्रकरणी पहुर पोलिस स्टेशनला गुन्हा दाखल करण्यात आला आहे.
जामनेर तालुक्यातील हरी नगर तांडा वाकोद येथील रहिवासी गोकुळ गोटीराम जाधव यास दोन मुली आहेत. त्याला तिसरा मुलगा हवा होता. मात्र त्याला तिसरी देखील मुलगी झाली. त्यामुळे त्याने त्या अर्भक मुलीच्या मुखात तंबाखू टाकली. तसेच तिला झोक्यात टाकून तिला ठार केले. या घटनेची वाच्याता होऊ नये म्हणून तिचा मृतदेह गावाच्या शेजारी असलेल्या नाल्याच्या शेजारी खड्डा खोदून त्यात पुरला. या घटनेप्रकरणी पहुर पोलिस स्टेशनला खूनाचा गुन्हा दाखल करण्यात आला आहे. वाकोद प्राथमिक आरोग्य केंद्राचे वैद्यकीय अधिकारी संदीप कुमावत यांनी या घटनेप्रकरणी फिर्याद दाखल केली आहे. पुढील तपास पोलिस उप निरीक्षक संजय बनसोड करत आहेत.
