जळगाव तालुक्यात जामनेर रस्त्यावर घडली घटना
जळगाव ( प्रतिनिधी ) – तालुक्यातील उमाळे गावाजवळ बुधवारी सायंकाळी ७:३० वाजता एका भीषण अपघातात तरुणाचा अज्ञात वाहनाच्या धडकेत दुर्दैवी मृत्यू झाला. जळगाव-जामनेर रस्त्यावर एका अज्ञात वाहनाने त्यांच्या दुचाकीला जोरदार धडक दिल्याने हा अपघात घडला. एमआयडीसी पोलिस ठाण्यात अपघाती मृत्यूची नोंद करण्यात आली आहे.
शरद समाधान पाटील (वय ४०, रा. उमाळे) असे मयत तरुणाचे नाव आहे. शरदच्या पश्चात त्याची आई सुपडाबाई, वडील समाधान, पत्नी आशा, मुलगी केतकी आणि मुलगा मनोज असा परिवार आहे. शेती करून ते कुटुंबाचा उदरनिर्वाह करत असे. (केसीएन)नेहमीप्रमाणे बुधवारी शरद पाटील शेतीच्या कामासाठी शेतात गेले होते. सायंकाळी शेतातून दुचाकीने घरी परतत असताना जळगाव-जामनेर रस्त्यावर एका अज्ञात वाहनाने त्यांच्या दुचाकीला जोरदार धडक दिली. ही धडक इतकी भीषण होती की, शरद पाटील गंभीर जखमी होऊन जागेवरच कोसळले.
अपघात घडल्यानंतर अज्ञात वाहनचालक घटनास्थळावरून पसार झाला. अपघाताची माहिती मिळताच परिसरातील नागरिकांनी तात्काळ घटनास्थळी धाव घेतली. त्यांनी जखमी अवस्थेतील शरद पाटील यांना तातडीने शासकीय वैद्यकीय महाविद्यालय व रुग्णालयात दाखल केले. मात्र, वैद्यकीय अधिकाऱ्यांनी तपासणी अंती मृत घोषित केले. घरातील कर्ता पुरुष गमावल्याने पाटील कुटुंबावर मोठे संकट कोसळले आहे. रुग्णालयात त्यांनी एकाच आक्रोश केला होता. या प्रकरणी एमआयडीसी पोलिस ठाण्यात नोंद करण्यात आली आहे.
