भुसावळ तालुक्यात राष्ट्रीय महामार्गावरील घटना
भुसावळ (प्रतिनिधी) : भुसावळकडून घरी परत पिंप्रीसेकम फाटा येथे जात असणाऱ्या एका मोटारसायकल चालकाने रस्त्याच्या कडेला उभ्या असलेल्या अवजड वाहन बलकरला जोरदार धडक दिली. या धडकेत मोटारसायकल चालक जागीच ठार असून भुसावळ बाजारपेठ पोलीस स्टेशनला गुन्ह्याची नोंद करण्यात आली आहे. हा अपघात शनिवार दि. २० रोजी ररात्री ८ वाजेनंतर घडला.
दामोदर शांताराम तायडे (वय ६३) असे मयत व्यक्तीचे नाव आहे. तालुक्यातील पिंप्रीसेकम फाटा, बोरोले लॉन जवळील रहिवासी दामोदर शांताराम तायडे हे मोटरसायकलने (क्रमांक एम.एच.१९ सी.ए. १०१४) ने रात्री ८ वाजेच्या दरम्यान भुसावळकडून घरी परतत होते. याचवेळी राष्ट्रीय महामार्ग क्रमांक ५३ वरील पटेल टी सेंटर जवळील सर्व्हिस रस्त्यांच्या कडेला मोठे बलकर (क्रमांक एम.एच.०१ ए.जे २०७१) उभे होते. या उभ्या असलेल्या बलकरला दामोदर तायडे यांनी मागून धडक दिल्याने जागीच मृत्यू झाला.
घटनास्थळी पोउपनिरी मंगेश जाधव यांनी भेट देवून सदरील घटनेचा पंचनामा केला व मयत इसमास ग्रामीण रुग्णालयात शवविच्छेदनासाठी दाखल केले. याबाबत बाजारपेठ पोलीस स्टेशनला गुन्ह्याची नोंद करण्यात आली आहे. सदरील बलकर ताब्यात घेण्यात आले असून उपविभागीय पोलीस अधिकारी यांच्या कार्यालयाच्या आवारात पोलिसांनी लावले आहे.
