रावेर तालुक्यातील अभोडा रस्त्यावरील घटना
रावेर (प्रतिनिधी) :- तालुक्यातील आभोडा रस्त्यावर ट्रॅक्टरने दिलेल्या भीषण धडकेत दुचाकीवरील दोन तरुणांचा जागीच मृत्यू झाला आहे. याबाबत रावेर पोलीस ठाण्यात अकस्मात मृत्यूची नोंद करण्यात आली आहे. ही दुर्दैवी घटना ८ सप्टेंबर रोजी दुपारी ४ वाजता घडली.
रामदास प्रकाश बारेला आणि करण प्रकाश बारेला (दोघेही रा. गुलाबवाडी) असे मयत झालेल्या तरूणांचे नाव आहे. फिर्यादी संजय मळक्या पावरा यांनी दिलेल्या माहितीनुसार, त्यांचे मित्र रामदास प्रकाश बारेला आणि करण प्रकाश बारेला (दोघेही रा. गुलाबवाडी) हे त्यांच्या हिरो कंपनीच्या मोटरसायकलवरून (क्र. एमपी १० आर ४७६६) रसलपूरकडून आभोडाकडे जात होते. साईनाथ रसाल पवार यांच्या शेताजवळ समोरून आलेल्या एका अज्ञात ट्रॅक्टर चालकाने आपला ट्रॅक्टर भरधाव वेगाने आणि निष्काळजीपणे चालवत त्यांच्या दुचाकीला जोरदार धडक दिली. या धडकेत रामदास आणि करण दोघेही गंभीर जखमी झाले आणि त्यांचा जागीच मृत्यू झाला. अपघातानंतर ट्रॅक्टर चालक कोणतीही मदत न करता घटनास्थळावरून पळून गेला. या प्रकरणी रावेर पोलीस स्टेशनमध्ये गुन्हा दाखल करण्यात आला आहे. पोलीस उपनिरीक्षक मनोज महाजन हे या प्रकरणाचा तपास करत आहेत.
