चाळीसगाव तालुक्यात मेहुणबारे पोलीस स्टेशनची कामगिरी
चाळीसगाव (प्रतिनिधी) :- तालुक्यातील मेहुणबारे पोलिसांनी एका चोरीचा गुन्हा उघडकीस आणत, चोरीला गेलेले ५० हजार रुपये किमतीचे ट्रॅक्टरचे सुटे भाग (स्पेअर पार्ट) हस्तगत केले आहेत. या प्रकरणी दोन संशयित आरोपींना अटक करण्यात आली असून, पोलीस त्यांच्याकडून अधिक तपास करत आहेत.
गेल्या ८ जून २०२५ रोजी मेहुणबारे पोलीस स्टेशनमध्ये प्रितम पुरुषोत्तम बागुल (वय २६, रा. चिंचगव्हाण, ता. चाळीसगाव) यांनी एक तक्रार दाखल केली होती. त्यांच्या मालकीचे सोनालिका कंपनीचे ट्रॅक्टर क्रमांक एम. एच. १९ ई. ए. ३२३४ शेडमध्ये उभे असताना, अज्ञात व्यक्तीने त्यातून ट्रॅली जोडण्याचे ‘डाबर व पिना’ तसेच रोटर नांगर जोडण्यासाठी लागणारे ‘आडवे उभे हात’ असे एकूण ५० हजार रुपये किमतीचे स्पेअर पार्ट चोरून नेले होते. या तक्रारीवरून गुन्हा दाखल करण्यात आला होता.
घटनेचे गांभीर्य लक्षात घेत, जिल्हा पोलीस अधीक्षक डॉ. महेश्वर रेडडी, अपर पोलीस अधीक्षक कविता नेरकर (चाळीसगाव) आणि उपविभागीय पोलीस अधिकारी धनंजय येरुळे (पाचोरा उपविभाग, चाळीसगाव उपविभाग चार्ज) यांनी पोलीस स्टेशन हद्दीतील चोरीचे गुन्हे उघडकीस आणून मुद्देमाल हस्तगत करण्याबाबत महत्त्वाच्या सूचना दिल्या होत्या. या गुन्ह्याचा सखोल तपास करून आरोपींचा शोध घेण्यासाठी प्रभारी अधिकारी सहाय्यक पोलीस निरीक्षक प्रवीण अ. दातरे यांनी पोलीस अधिकारी व अंमलदार यांचे एक विशेष पथक तयार केले.(केसीएन)या पथकाने गोपनीय माहितीच्या आधारे आणि कौशल्याने तपास करत या गुन्ह्याची उकल केली. तपासादरम्यान प्रवीण जालिंदर पाटील (वय २८) आणि दिलीप श्रीराम निकम (वय २२, दोघे रा. चिंचगव्हाण, ता. चाळीसगाव) या संशयित आरोपींना ताब्यात घेऊन अटक करण्यात आली.
पोलिसांनी कोठडीत घेतलेल्या दोन्ही आरोपींकडे गुन्ह्यासंबंधी कसून चौकशी केली असता, त्यांनी गुन्ह्याची कबुली दिली. त्यांनी चोरी केलेले एकूण ५० हजार रुपये किमतीचे ट्रॅक्टरचे स्पेअर पार्ट काढून दिले असून, पोलिसांनी ते जप्त केले आहेत. यामुळे चोरीला गेलेला संपूर्ण मुद्देमाल परत मिळवण्यात पोलिसांना यश आले आहे. ही कामगिरी सहाय्यक पोलीस निरीक्षक प्रवीण अ. दातरे, पोलीस उपनिरीक्षक सुहास आव्हाड, पोलीस हेडकॉन्स्टेबल मोहन सोनवणे, किशोर पाटील, शांताराम पवार आणि पोलीस कॉन्स्टेबल विनोद बेलदार यांनी पार पाडली.
