बीड जिल्ह्यातील घटना, जखमी भुसावळ तालुक्यातील रहिवासी
भुसावळ (प्रतिनिधी) – भुसावळ येथील भाविकांच्या टेम्पो ट्रॅव्हलर बसला बीड जिल्ह्यात अपघात झाला आहे. पंढरपूरला देवदर्शनासाठी जाणाऱ्या भाविकांच्या या मिनीबसने ओव्हरटेक करताना एसटी बसला पाठीमागून धडक दिली. या अपघातात चार जण गंभीर, तर चार किरकोळ जखमी झाले. हा अपघात बीड तालुक्यातील रौळसगावजवळ शनिवारी सकाळी झाला. जखमींना जिल्हा रुग्णालयात दाखल केले आहे.
जळगाव जिल्ह्यातील भुसावळ येथील कोळी कुटुंब व त्यांचे नातेवाईक पंढरपूरला देवदर्शनासाठी जात होते. त्यांच्या टेम्पो मिनीबस (एमएच १९ वाय ६१०२) यात जवळपास १७ प्रवासी होते. याच मिनीबसने सोलापूर-धुळे या राष्ट्रीय महामार्गावरील रौळसगावजवळ राज्य परिवहन महामंडळाच्या बसला (एमएच १४ डीटी १९२९) ओव्हरटेक करण्याचा प्रयत्न केला. त्यावेळी चालकाचे नियंत्रण सुटून पाठीमागून धडक दिल्याने मिनीबस रस्त्याच्या खाली गेली. तसेच समोरील भागही चेपला गेला. यात बसमधील प्रवासी गंभीर जखमी झाले. अपघात होताच एसटी बस बाजूला जाऊन थांबली, तर परिसरातील लोकांनी लगेच धाव घेत अपघातग्रस्तांना मदत केली.
महामार्ग पोलिस, नेकनूर पोलिस आणि रुग्णवाहिका अपघातस्थळी पोहोचली. त्यांनी जखमींना तातडीने जिल्हा रुग्णालयात पाठविले. यातील चौघांची प्रकृती चिंताजनक असून, चौघांची स्थिर असल्याचे डॉक्टरांनी सांगितले. दरम्यान, अपघातानंतर उपनिरीक्षक यशवंत घोडके, संजय खताळ, अनिल तांदळे, विलास ठोंबरे, सांगळे, जालिंदर सुरवसे, पह्राट यांच्यासह नेकनूर पोलिसांनी जखमींना मदत केली. तसेच वाहतूकही सुरळीत केली. जखमींमध्ये नर्मदा एकनाथ कोळी (वय ६०), कैलास बोदडे (चालक), अश्विनी सपकाळे (वय २५), राजर्षी कोळी (१६) हे गंभीर जखमी आहेत. आशा कोळी (५०), सुरेखा कोळी (४०), मनीषा कोळी (४०), राहुल कोळी (३२) हे किरकोळ जखमी आहेत. हे सर्व जखमी भाविक जळगाव जिल्ह्यातील भुसावळ येथील रहिवासी आहेत. घटनेची माहिती मिळाल्यानंतर त्यांच्या बीड व परिसरातील नातेवाइकांनी जिल्हा रुग्णालयात धाव घेतली.
