चाळीसगाव- धुळे रेल्वे लाईनवरील घटना
चाळीसगाव (प्रतिनिधी) :- तालुक्यातील एका २१ वर्षीय तरुणाचा रेल्वेखाली आल्याने मृत्यू झाल्याची घटना गुरुवारी दुपारी २ वाजेच्या सुमारास उघडकीस आली आहे. तरवाडे येथील तो रहिवासी होता. याबाबत संबंधित पोलीस स्टेशनला घटनेची नोंद करण्यात आली आहे.
सुजित भास्कर महाडीक (वय २१, रा. तरवाडे ता. चाळीसगाव) असे मयत तरुणाचे नाव आहे. सुजित याची शाळेत असताना हुशार विद्यार्थी ओळख होती. २०१९ मध्ये येथील शाळेत दहावीला असताना पहिल्या क्रमांकाने उत्तीर्ण झाला होता. येथील रहिवासी भास्कर निंबा महाडीक यांचा तो एकुलता एक मुलगा होता. गुरुवारी दि. २१ रोजी दुपारी दोनच्या सुमारास चाळीसगाव- धुळे रेल्वे लाईनवर सुजित गेला असताना रेल्वे अपघातात त्याचा मृत्यू झाला.
पोलिसांनी रुग्णालयात त्याचा मृतदेह हलविला. कुटुंबियांना घटना कळताच त्यांनी आक्रोश केला. त्याच्या मृत्यूची वार्ता तरवाडे गावात कळताच शोककळा पसरली. या घटनेमुळे परिसरात हळहळ व्यक्त होत आहे. याबाबत संबंधित पोलीस स्टेशनला घटनेची नोंद करण्यात आली आहे.
