जळगाव तालुक्यातील वडनगरी फाट्याजवळील घटना
जळगाव (प्रतिनिधी) :- तालुक्यातील वडनगरी फाट्याजवळ एका रिक्षा चालकाने २३ वर्षीय मुलाला माझ्याकडे का पाहतोय..?, असा जाब विचारत त्याला मारहाण करत, त्याच्या हाताच्या दंडावर चाकुने वार केल्याची घटना बुधवारी दिनांक १० रोजी सायंकाळी ५ वाजता घडली. या प्रकरणी तालुका पोलिस स्टेशनला रिक्षा चालकाविरुध्द गुन्हा दाखल करण्यात आला आहे.
तालुक्यातील आव्हाणे येथील धीरज राजाराम पाटील (वय २३) हा तरुण बुधवारी सायंकाळी वडनगरी फाट्याजवळील बडे जटाधारी महादेव मंदिर येथे दर्शनाला गेला हाता. दर्शन घेतल्यानंतर घरी जात असताना, मंदिरासमोरील रस्त्यालगत मयुर उत्तम पाटील (पत्ता माहिती नाही) या रिक्षा चालकाने धीरजला माझ्याकडे का पाहतोय..? असे म्हणत जाब विचारला. त्यावर धीरजने पाहत नसल्याचे सांगितले. मात्र, रिक्षा चालकाने वाद घालून, धीरजला शिवीगाळ केली.
तसेच त्यांच्या डाव्या हाताच्या दंडावर चाकुने वार करत, धीरजला जखमी केले. या प्रकरणी तालुका पोलिस स्टेशनमध्ये गुन्हा दाखल करण्यात आला असून, पुढील तपास गुलाब माळी हे करत आहेत.