कासमवाडी येथील घटनेत जळगाव एलसीबीची कामगिरी
जळगाव (प्रतिनिधी) : शहरात कासमवाडी येथे गुरुवारी रात्री ज्ञानेश्वर उर्फ नाना भीकन पाटील (वय २७) या तरुणाच्या खून प्रकरणातील संशयित आरोपीला नशिराबाद येथून जळगाव एलसीबीने अटक केली आहे.
योगेश संतोष पाटील उर्फ पिंटू (२७, रा. कासमवाडी, जळगाव) असे अटक केलेल्या संशयित आरोपीचे नाव आहे. शहरातील कासमवाडी परिसरात गुरुवारी मध्यरात्री जुना वाद उफाळून आल्याने दोन कुटुंबांमध्ये तुंबळ राडा झाला. या वादात नाना उर्फ ज्ञानेश्वर भिका पाटील वय २७ या तरुणावर दोन तरुणांनी धारदार शस्त्राने तीन वार केले. या हल्ल्यात ज्ञानेश्वरच्या पोटावर, डाव्या मांडीवर व अंगावर वार झाल्याने त्याला गंभीर जखमी अवस्थेत त्याला तातडीने जीएमसी रुग्णालयात नेण्यात आले. मात्र उपचारादरम्यान त्याचा मृत्यू झाला. दरम्यान, हल्ल्यानंतर मारेकरी घटनास्थळावरून पसार झाले होते.
घटनेनंतर रुग्णालयात नातेवाईकांची व परिसरातील नागरिकांची मोठी गर्दी झाली होती. त्यामुळे एमआयडीसी पोलिसांनी तत्काळ रुग्णालयात जाऊन बंदोबस्त वाढवला. या प्रकरणी एमआयडीसी पोलिसांनी गुन्हा दाखल करून संशयित आरोपींचा तपास सुरु केला होता. अखेर अवघ्या काही तासांत पोलिसांनी संशयित आरोपीला नशिराबाद परिसरातून शिताफीने अटक केली आहे. निरीक्षक राहुल गायकवाड यांच्या मार्गदर्शनाखाली पोहेकॉ नितीन बाविस्कर, किशोर पाटील, छगन तायडे, रविंद्र कापडणे या पथकाने हि कारवाई केली.
