जळगावातील यशवंत नगर येथील घटना
जळगाव (प्रतिनिधी) :- नामांकित कंपनीचे बिटकॉईन खरेदी करून त्यात अधिकचा नफा देण्याचे आमिष दाखवून तरुणाची १४ लाख १२ हजार ९२६ रुपयांमध्ये फसवणूक करण्यात आली. हा प्रकार २ मार्च ते ४ मार्चदरम्यान ऑनलाइन पद्धतीने घडला. याप्रकरणी सायबर पोलिस ठाण्यात अज्ञाताविरुद्ध गुन्हा दाखल करण्यात आला आहे.
सर्वेश किरण भोसले (रा. यशवंतनगर) अशी फसवणूक झालेल्या तरुणाचे नाव आहे. भोसले यांच्याशी अनोळखीने २ ते ४ मार्चदरम्यान संपर्क साधून टेलिग्राम खात्यावर एक लिंक पाठवली. तिला क्लिक केल्यानंतर क्रिप्टो करन्सी संबंधित कंपनीचा लोगो, बनावट वेबसाइट नामांकित कंपनीचे असल्याचे भासवण्यात आले. त्यानंतर भोसले यांना बिटक्वॉइन विकत घेण्यास सांगून सुरुवातीला एक हजार ८०० रुपये नफा दिला.
त्या माध्यमातून विश्वास संपादन करून त्यांच्याकडून वेळोवेळी १४ लाख १२ हजार ९२६ रुपये स्वीकारले. त्यावर नफा व मुद्दलही मिळत नसल्याने भोसले यांना त्यांची फसवणूक झाल्याचे लक्षात आले. त्यांनी सायबर पोलिस ठाण्यात फिर्याद दिली आहे. त्यानुसार अध्यात आरोपीविरुद्ध गुन्हा दाखल करण्यात आला आहे.
