जळगाव शहरातील गणेश नगर येथील घटना
जळगाव (प्रतिनिधी) : शहरातील एका तरुण उद्योजकाने छताला गळफास लावून घेत आत्महत्या केल्याची घटना सोमवार दि. २० मे रोजी दुपारी २ वाजेच्या सुमारास उघडकीस आली आहे. या घटनेप्रकरणी जिल्हापेठ पोलीस स्टेशनला अकस्मात मृत्यूची नोंद करण्याचे काम सुरू होते.
सनी ईश्वरलाल केसवानी (वय ३६, रा.गणेश नगर,जळगाव)असे मयत उद्योजकाचे नाव आहे. तो गणेश नगरात आई-वडील, पत्नी, एक मुलगा, एक मुलगी यांच्यासह राहत होता. एमआयडीसी येथे त्याची स्वतःची फॅक्टरी आहे. त्यानुसार तो परिवाराचा उदरनिर्वाह करीत होता. सनी केसवानी यांची पत्नी माहेरी गेली होती. सोमवारी दुपारी घरी तो एकटाच होता. यावेळी त्याने छताला गळफास लावून आत्महत्या केली.
दरम्यान शेजारच्या नागरिकांना माहिती समजताच त्यांनी त्याला शासकीय वैद्यकीय महाविद्यालय व रुग्णालयात उपचारासाठी दाखल केले. सनी केसवानी यांना तपासून वैद्यकीय अधिकारी डॉ.स्नेहल दुगड यांनी मयत घोषित केले. यावेळी कुटुंबीयांनी एकच हंबरडा फोडला.जिल्हा पेठ पोलीस स्टेशनला अकस्नात मृत्यूची नोंद करण्याचे काम सुरू होते. तरुण उद्योजकाच्या मृत्यूमुळे शासकीय रुग्णालयात अनेक व्यापारी, उद्योजकांनी गर्दी केली होती.
